អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា បច្ចុប្បន្នមានកសិករប្រមាណ ៤ សហគមន៍ហើយ ដែលបានបញ្ជាក់ថានឹងចូលរួមនឹងប្រែខ្លួនទៅជាកសិកម្មទំនើប។ ខណៈ​ដែល​កាលពីពេលថ្មីៗនេះ ក្រសួងបានប្រកាសទទួលស្គាល់សហគមន៍កសិកម្មទំនើបស្រូវនាងអំ នៅ​ស្រុកស្វាយលើ ដែលមានកសិករចំនួន ៨៤ គ្រួសារ និងមានផ្ទៃដីផលិតកម្មជាង ៨០០ហិកតា។

ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ នៃក្រសួងកសិកម្ម រុក្ខាប្រមាញ់ និង​នេសាទ បានមានប្រសាសន៍ប្រាប់ព័ត៌មាន ប៊ីធីវី នៅល្ងាចថ្ងៃទី១ ខែមេសា ឆ្នាំ២០២៤នេះថា ក្រៅ​ពី​សហគមន៍ស្រូវនាងអំ និងស្រូវមួយចំនួនទៀតនៅស្រុកស្វាយលើ ក៏​មាន​សហគមន៍​មួយ​ចំនួន​ថែម​ទៀតដែរ ដែលគ្រោងនឹងប្រកាសទទួលស្គាល់ជាផ្លូវការក្នុងឆាប់ៗនេះ បន្ទាប់ពី​ក្រុម​ការងារ​បញ្ចប់​នូវការរៀបចំនៅផែនការអាជីវកម្ម ក៏ដូចជាសិក្សា​ទៅ​លើ​សមិទ្ធ​ផល​សម្រាប់​សហគមន៍​ទាំង​នោះ។ ក្នុងនោះមានដូចជា សហគមន៍សំបូរមានជ័យនៅឯស្រុកស្ទឹងត្រង់ ខេត្ត​កំពង់ចាម ក៏បានឯកភាពថានឹងបង្កើតដែរ ដែល​គ្រោង​ធ្វើ​ជាស​ហគមន៍​កសិកម្ម​ទំនើប​ដែល​ធ្វើ​ផលិត​កម្ម​បន្លែលើផ្ទៃដី ១៣ហិចតា ដែលគ្រោងដាក់ផ្ទះសំណាញ់ចំនួន ៤០០ - ៥០​០​ផ្ទះ​សំណាញ់ ហើយក៏គ្រោងនឹងបង្កើតសហគមន៍កសិកម្មទំនើបនៅឯស្រុកបន្ទាយស្រី ដែល​ជា​សហគមន៍​ផលិតបន្លែដូចគ្នា ដែលគ្រោងបង្កើតក្នុងពេលឆាប់ៗនេះ ដោយ​ទទួល​បាន​ការ​ឯកភាព​មួយ​ចំនួនរួចហើយពីប្រជាកសិករនៅទីនោះ។

ឯកឧត្តម ឃឹម ហ្វីណង់ បានបន្ថែមថា សម្រាប់ផែនការឆ្នាំនេះ ក្រសួង​កសិកម្ម​គ្រោង​នឹ​ង​ផ្តោត​ទៅ​លើ​ដំណាំ​ចំនួន៤ គឺមានបន្លែ ស្រូវ ម្រេច និងស្វាយចន្ទីរ។ ឯកឧត្តមបន្ថែមទៀតថា ដោយសារ​ការងារ​នេះ​ទើបចាប់ផ្តើម ប៉ុន្តែអ្វីដែលក្រសួងរំពឹងទុកនោះ គឺ ចង់ជំរុញឲ្យសហគមន៍នីមួយៗ នឹង​មាន​ទំហំធំ មានសេដ្ឋកិច្ចមាត្រដ្ឋាន ដើម្បីធ្វើយ៉ាងណា ដើម្បីឲ្យថ្លៃ​ដើម​ការ​ផលិត​របស់​ប្រជា​កសិករ​មាន​ការថយចុះ។

សូមជម្រាបជូនថា សហគមន៍កសិកម្មទំនើប តម្រូវឱ្យប្រជាកសិករចូលរួមផលិតរួមគ្នា គ្រប់​គ្រង​រួមគ្នា ដើម្បីងាយស្រួលផ្គត់ផ្គង់លើទីផ្សារ និងផ្តល់ផលចំណេញច្រើន។ ចំពោះប្រជា​សហគមន៍​ដែល​មាន​បំណង​ចង់ធ្វើកសិកម្មបែបទំនើប ហើយត្រូវការដើមទុនធ្វើអាជីវកម្ម ក្រសួងមាន​គម្រោង​ហិរញ្ញវត្ថុ ដែលផ្តល់ការគាំទ្រចាប់ពីការកសាងផែនការអាជីវកម្ម ការផ្តល់ប្រាក់កម្ចី ការ​គាំទ្រ ផ្តល់ជាអំណោយមូលធុន៕ អត្ថបទ៖ ឈិត បូរ៉ាវី