ភ្នំពេញ ៖ សាកលវិទ្យាភូមិន្ទវិចិត្រសិល្បៈ រៀបចំកម្មវិធីពិព័រណ៍ទេពកោសល្យ និងស្នាដៃនិស្សិតលើកទី៧ ក្រោមប្រធានបទ «មរតកទាំងប្រាំឆ្នាំ ២០២៤» ខណៈពិព័រណ៍នេះរៀបចំឡើងរយ:ពេល៣ថ្ងៃ គឺចាប់ពីថ្ងៃទី១ រហូតដល់ថ្ងៃទី៣ ខែមេសា ឆ្នាំ២០២៤ នៅទីតាំងសាកលវិទ្យាល័យដោយផ្ទាល់។

​ក្នុងឱកាសបើកពិព័រណ៌នេះ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: បានផ្ដល់ជាវត្តមានចូលរួមទស្សនាដោយផ្ទាល់។ លោកជំទាវរដ្ឋមន្ត្រី លើកឡើងថា កម្មវិធីតាំងពិព័រណ៍ទេពកោលស្យ និងស្នាដៃនិស្សិតលើកទី៧ នេះគឺជាព្រឹត្តិការណ៍មួយយ៉ាងសំខាន់របស់សាកលវិទ្យាល័យ ដែលតែង រៀបចំឡើងក្នុងគោលបំណងផ្តល់ឱកាសដល់និស្សិត ក្នុងការតាំងបង្ហាញ និងសម្តែងស្នាដៃរបស់ខ្លួនតាម ឯកទេសជំនាញនៃមហាវិទ្យាល័យនីមួយៗ ដែលក្នុងនោះរួមមាន ៖ មហាវិទ្យាល័យសិល្បៈសូនរូប, មហាវិទ្យា ល័យស្ថាបត្យកម្មនិងនគរូបនីយវិទ្យា, មហាវិទ្យាល័យបុរាណវិទ្យា, មហាវិទ្យាល័យសិល្បៈនាដសាស្ត្រ, មហា វិទ្យាល័យតូរ្យតន្ត្រី និងដេប៉ាតឺម៉ង់ថ្នាក់ឆ្នាំសិក្សាមូលដ្ឋាន។ 

ក្រៅពីនេះគឺដើម្បីចូលរួមចំណែកក្នុងការផ្សព្វ ផ្សាយឱ្យកាន់តែទូលំទូលាយ និងចូលរួមអភិរក្សមរតកវប្បធម៌ជាតិទាំងរូបី និងអរូបី ព្រមទាំងពង្រីកនូវចំណេះ ដឹងបន្ថែមអំពីសិល្បៈវប្បធម៌ជាតិ ដល់សិស្ស និស្សិត និងសាធារណជន ដែលអញ្ជើញចូលរួមទស្សនាដោយ ផ្ទាល់ និងនៅតាមបណ្តាញសង្គម ក៏ដូចជាចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិដែលនឹងចូល មកដល់នាពេលដ៏ខ្លីខាងមុខ។

លើសពីការបង្ហាញស្នាដៃ លោកជំទាវបញ្ជាក់ថា ព្រឹត្តិការណ៍នេះ ក៏បង្ហាញពីស្មារតីសាមគ្គីភាព មិត្តភាព ការកសាងទំនាក់ទំនងល្អ នឹងឆ្លុះបញ្ចាំងពីតួនាទីរបស់យុវជនបន្តវេន ដែលចូលរួមកាន់តែសកម្មថែមទៀតក្នុងសកម្មភាពគាំទ្រ លើកស្ទួយ អភិរក្សនិងអភិវឌ្ឍមរតកវប្បធម៌ជាតិ និងជាចលករជម្រុញទាំងកំណើនសង្គម-សេដ្ឋកិច្ច និងកិត្យានុភាពជាតិស្របតាមទិសដៅដែលជាចក្ខុវិស័យរបស់រាជរដ្ឋាភិបាលកម្ពុជា។

 ក្នុងឱកាសដាក់ពិព័រណ៍ស្នាដៃនេះ និស្សិត ដួង សុខជា និស្សិតឆ្នាំទី ១ ផ្នែកនាដសាស្ត្រ ក៏បានរៀបរាប់លើស្នាដៃដែលក្រុមនិស្សិតឆ្នាំមូលដ្ឋានរួមគ្នាបង្កើតលើកយកមកបង្ហាញផងដែរ។ រូបគេបញ្ជាក់ថា ការចូលរួមក្នុងពិព័រណ៍នេះ ផ្ដល់ជាផលចំណេញជាចំណេះដឹងជាច្រើនដល់អ្នកចូលរួម ពិសេសផ្នែកវប្បធម៌ប្រពៃណីជាតិខ្មែរ។

សម្រាប់ក្រុមយយុវជន ជាអ្នកចូលរួមទស្សនាក្នុងពិព័រណ៍នេះ ក៏បានបង្ហាញការកោតសសើរជាខ្លាំង ចំពោះស្នាដៃរបស់ក្រុមនិស្សិតសិក្សានៅសាកលវិទ្យាល័យភូមិន្ទវិចិត្រសិល្បៈ។ ពួកគេឃើញថា នេះជាពិព័រណ៍ដែលផ្ដល់ជាចំណេះដឹងជាច្រើនដល់អ្នកចូលរួម។

សាកលវិទ្យាល័យភូមិន្ទវិចិត្រសិល្បៈ បានរៀបចំពិព័រណ៍ទេព កោសល្យ និងស្នាដៃនិស្សិតលើកទី៧នេះឡើង ក្រោមប្រធានបទ “មរតកទាំងប្រាំ ឆ្នាំ២០២៤- ដែលកម្មវិធី នេះបានប្រព្រឹត្តទៅចំនួន៦លើករួចមកហើយ ដោយចាប់ផ្តើមតាំងពីឆ្នាំ២០១៥រហូតមក។

អត្ថបទ៖ គឹមហុក