យោងតាមក្រុមអ្នកស្រាវជ្រាវ និងមន្ត្រីរដ្ឋាភិបាល បានឲ្យដឹងថា គណនីសម្ងាត់ជាច្រើនរបស់ចិនកំពុងក្លែងបន្លំតាមប្រព័ន្ធអ៊ីនធឺណិតធ្វើជាអ្នកគាំទ្រជនជាតិអាមេរិក ចំពោះអតីតប្រធានាធិបតីលោក Donald Trump ផ្សព្វផ្សាយទ្រឹស្តីឃុបឃិត ធ្វើឲ្យមានការបែកបាក់ក្នុងស្រុក និងវាយប្រហារប្រធានាធិបតីលោក Joe Biden នៅមុនការបោះឆ្នោត ក្នុងខែវិច្ឆិកា។

គណនីទាំងនេះបង្ហាញពីការផ្លាស់ប្តូរយុទ្ធសាស្ត្រដ៏មានសក្តានុពល នៅក្នុងរបៀបដែលទីក្រុងប៉េកាំងមានគោលបំណងមានឥទ្ធិពលលើនយោបាយអាមេរិក ដោយមានឆន្ទៈកាន់តែខ្លាំងឡើងៗ ក្នុងការកំណត់គោលដៅលើបេក្ខជនសំខាន់ៗ និងគណបក្ស ក្នុងនោះរួមទាំងលោក Biden ផងដែរ។ ដើម្បីជាការបន្ទរលើយុទ្ធនាការដ៏មានឥទ្ធិពលរបស់រុស្ស៊ី នៅមុនការបោះឆ្នោតឆ្នាំ២០១៦ ប្រទេសចិនហាក់ដូចជាកំពុងព្យាយាមប្រើប្រាស់ការបែងចែកបក្សពួក ដើម្បីបំផ្លាញគោលនយោបាយរបស់រដ្ឋបាលលោក Biden ទោះបីជាមានការខិតខំប្រឹងប្រែង នាពេលថ្មីៗនេះ ដើម្បីបន្ថយការឡើងកម្ដៅក្នុងទំនាក់ទំនងរបស់ប្រទេសទាំង២ ក៏ដោយ។

គណនីចិនមួយចំនួន ក្លែងបន្លំជាអ្នកគាំទ្រយ៉ាងក្លៀវក្លា ចំពោះលោក Trump ក្នុងនោះរួមទាំងគណនី នៅលើបណ្ដាញសង្គំ X (ពីមុនជា Twitter) ដែលសន្មតថា ជា «ឪពុក ប្តី និងកូនប្រុស» ពោលគឺជាអ្នក «យល់ស្របទាំងស្រុងគ្រប់រឿងទាំងអស់»។ គណនីទាំងនោះបានចំអកដល់អាយុរបស់លោក Biden និងបានចែករំលែករូបភាពក្លែងក្លាយរបស់លោកនៅក្នុងឈុតសម្លៀកពំពាក់អ្នកទោស ឬបានអះអាងថា លោក Biden គឺជាបុគ្គលប្រព្រឹត្តផ្លូវភេទលើកុមារយ៉ាងអាក្រក់ ខណៈពេលដែលផ្សព្វផ្សាយពាក្យស្លោកថា លោក Trump «ធ្វើឲ្យអាមេរិកមានភាពអស្ចារ្យម្ដងទៀត»។

អ្នកវិភាគជាន់ខ្ពស់នៅវិទ្យាស្ថានសម្រាប់ការសន្ទនាយុទ្ធសាស្ត្រ ដែលជាអង្គការស្រាវជ្រាវមិនរកប្រាក់ចំណេញ ដែលបានរកឃើញក្រុមតូចមួយនៃគណនីក្លែងក្លាយឈរឈ្មោះជាអ្នកគាំទ្រចំពោះលោក Trump គឺលោកស្រី Elise Thomas បាននិយាយថា៖ «ខ្ញុំមិនធ្លាប់បានឃើញអ្វីទាំងអស់នេះ ពីមុនមកទេ»៕