មន្ត្រីក្រសួងសុខាភិបាល នៅថ្ងៃអង្គារ (ទី២ មេសា) បានឲ្យដឹងថា អាហារបំប៉នរបស់ជប៉ុនដែលស្ថិតនៅចំកណ្តាលនៃការកើនឡើងនូវការភ័យខ្លាចផ្នែកសុខភាពនោះ ឥឡូវនេះត្រូវបានភ្ជាប់ទៅនឹងការចូលសម្រាកក្នុងមន្ទីរពេទ្យយ៉ាងហោចណាស់ ១៥៧ករណី។

តួលេខនេះបានបង្ហាញឲ្យឃើញពីការកើនឡើងនៃការចូលមន្ទីរពេទ្យពីចំនួន ១១៤ករណីដែលក្រុមហ៊ុនផលិតឱសថ Kobayashi Pharmaceutical បាននិយាយកាលពីថ្ងៃសុក្រសប្ដាហ៍កន្លងទៅថា មានទំនាក់ទំនងទៅនឹងផលិតផលរបស់ខ្លួនដែលមានផ្ទុកមេដំបែក្រហម ឬ «Beni Koji» (បេនិកូជិ)។ អ្នកនាំពាក្យម្នាក់របស់ក្រុមហ៊ុន Kobayashi បានប្រាប់អំពីករណីចូលសម្រាកព្យាបាលនៅមន្ទីរពេទ្យចុងក្រោយ តែមិនបានបញ្ជាក់អ្វីលម្អិតបន្ថែមនោះទេ។

កាលពីថ្ងៃសុក្រ ក្រុមហ៊ុន Kobayashi បាននិយាយថា ខ្លួនកំពុងស៊ើបអង្កេតការស្លាប់ចំនួន ៥ករណីដែលអាចមានការទាក់ទងនឹងអាហារបំប៉ន ដែលប្រើសម្រាប់ជួយកាត់បន្ថយកូឡេស្តេរ៉ុល។ រដ្ឋាភិបាល និងក្រុមហ៊ុនកំពុងស៊ើបអង្កេតថា តើថ្នាំគ្រាប់នេះបណ្តាលឲ្យមនុស្សស្លាប់ និងបញ្ហាសុខភាពផ្សេងទៀតដែលភាគច្រើនប៉ះពាល់លើតម្រងនោមដែរ ឬទេ៕