ប្រទេសឥណ្ឌា បានច្រានចោលការប្តូរឈ្មោះរបស់ប្រទេសចិនប្រហែល ៣០កន្លែង នៅក្នុងរដ្ឋហិម៉ាល័យភាគឦសាននៃរដ្ឋ Arunachal Pradesh នៅថ្ងៃអង្គារនេះ ដោយហៅការផ្លាស់ប្តូរឈ្មោះនេះថា «គ្មានន័យ» និងបញ្ជាក់ម្តងទៀតថា ខេត្តជាប់ព្រំដែន គឺជាផ្នែក «ដ៏សំខាន់»នៃប្រទេសឥណ្ឌា។

ទីក្រុងប៉េកាំងនិយាយថា Arunachal Pradesh ដែលខ្លួនហៅថា Zangnan គឺជាផ្នែកមួយនៃទីបេខាងត្បូង ជាការអះអាងដែលញូវដែលី បានច្រានចោលម្តងហើយម្តងទៀត។ ប្រទេសចិន ក៏បានបង្កើនភាពតានតឹងកាលពីមួយឆ្នាំមុន ដោយដាក់ឈ្មោះចិនទៅទីតាំងចំនួន១១ ក្នុងរដ្ឋនេះ។

កងទ័ពនៃប្រទេសជិតខាងប្រដាប់អាវុធនុយក្លេអ៊ែរ បានចូលរួមក្នុងការប៉ះទង្គិចគ្នាបន្តិចបន្តួច នៅតាមព្រំដែនជម្លោះរបស់ពួកគេក្នុងរដ្ឋនេះ ក្នុងខែធ្នូ ឆ្នាំ ២០២២ ហើយភាពតានតឹង បានធូរស្រាលបន្ទាប់ពីកិច្ចពិភាក្សាផ្នែកយោធា និងការទូតយ៉ាងទូលំទូលាយ។

ទោះបីជាយ៉ាងណាក៏ដោយ រដ្ឋនេះជារឿយៗជាមូលហេតុនៃជម្លោះរវាងប្រទេសយក្សអាស៊ី ដែលទំនាក់ទំនងរបស់ពួកគេ បានធ្លាក់ចុះ ចាប់តាំងពីការប៉ះទង្គិចគ្នានៅតាមព្រំដែនដ៏បង្ហូរឈាមរវាងកងទ័ពរបស់ពួកគេ នៅតំបន់ហិម៉ាល័យភាគខាងលិច ក្នុងឆ្នាំ ២០២០។

នៅក្នុងសេចក្តីថ្លែងការណ៍មួយកាលពីថ្ងៃសៅរ៍ ប្រទេសចិន បាននិយាយថា ខ្លួនបានធ្វើស្តង់ដាឈ្មោះប្រហែល ៣០កន្លែងនៅក្នុងអ្វីដែលខ្លួនហៅថា ទីបេខាងត្បូង «ដោយអនុលោមតាមបទប្បញ្ញត្តិពាក់ព័ន្ធស្តីពីការគ្រប់គ្រងឈ្មោះកន្លែងរបស់ក្រុមប្រឹក្សារដ្ឋ»។