ប្រធានាធិបតីកៀហ្ស៊ីស៊ីស្ថាន លោក Sadyr Japarov នៅថ្ងៃអង្គារ (ទី២ ខែមេសា) នេះ បានចុះហត្ថលេខាឲ្យចូលជាច្បាប់ជាធរមានលើសេចក្ដីស្នើច្បាប់ស្តីពីការរឹតបន្តឹងការគ្រប់គ្រងរបស់រដ្ឋលើអង្គការមិនមែនរដ្ឋាភិបាល (NGO) ដែលទទួលបានមូលនិធិពីបរទេស ដោយការចេញច្បាប់នេះ បាននាំឲ្យស្ថាប័ន និងក្រុមសិទ្ធិមនុស្សជាច្រើន រិះគន់ថា ជាការរឹតត្បិតយ៉ាងតឹងរ៉ឹង។

ច្បាប់ដែលប្រើប្រាស់បទប្បញ្ញត្តិ និងភាសាស្រដៀងនឹងច្បាប់របស់រុស្ស៊ីឆ្នាំ២០១២ ស្ដីអំពី «ភ្នាក់ងារបរទេស» ដាក់ចេញនូវកាតព្វកិច្ចរាយការណ៍បន្ថែម ចំពោះអង្គការក្រៅរដ្ឋាភិបាល ជុំវិញការទទួលបានមូលនិធិពីបរទេសដែលចូលរួមក្នុងសកម្មភាព «នយោបាយ»។ លើសពីនេះទៀត ច្បាប់នេះក៏ផ្តល់ឲ្យអាជ្ញាធរនៃប្រទេសអាស៊ីកណ្តាលមួយនេះនូវសិទ្ធិអំណាចត្រួតពិនិត្យកាន់តែច្រើនជាងមុន និងអាចដាក់ទណ្ឌកម្មឧក្រិដ្ឋកម្ម ក្នុងករណីមិនគោរពតាម។

អង្គការដើម្បីសន្តិសុខ និងកិច្ចសហប្រតិបត្តិការនៅអឺរ៉ុប បានព្រមានកាលពីខែកុម្ភៈថា ការអនុម័តច្បាប់នេះ «នឹងបង្កឲ្យមានផលប៉ះពាល់អវិជ្ជមានយ៉ាងលើសលប់ទៅលើសង្គមស៊ីវិល អ្នកការពារសិទ្ធិមនុស្ស និងប្រព័ន្ធផ្សព្វផ្សាយ នៅប្រទេសកៀហ្ស៊ីស៊ីស្ថាន»។

តែការិយាល័យរបស់លោក Japarov បានឲ្យដឹងនៅក្នុងសេចក្តីថ្លែងការណ៍មួយថា ច្បាប់នេះត្រូវបានបង្កើតឡើង ក្នុងគោលបំណងធ្វើឲ្យការងាររបស់អង្គការក្រៅរដ្ឋាភិបាលកាន់តែមានតម្លាភាព៕