មន្ត្រីជាន់ខ្ពស់របស់ប្រទេសម៉ាឡេស៊ី នៅថ្ងៃអង្គារ (ទី២ ខែមេសា) បាននិយាយថា នគរបាលម៉ាឡេស៊ីកំពុងស៊ើបអង្កេតលើរបាយការណ៍ដែលថា បុរសប្រដាប់អាវុធម្នាក់ដែលជាប់ឃុំខ្លួន ក្នុងរដ្ឋធានីរបស់ប្រទេស កាលពីសប្តាហ៍មុន មានទំនាក់ទំនងទៅនឹងក្រុមឧក្រិដ្ឋកម្មរបស់ប្រទេសអ៊ីស្រាអែល។

អធិការនគរបាលលោក Razarudin Husain បានកំណត់អត្តសញ្ញាណជនសង្ស័យថា ឈ្មោះ Shalom Avitan អាយុ ៣៦ឆ្នាំ ដែលត្រូវបានចាប់ខ្លួននៅសណ្ឋាគារមួយ ក្នុងទីក្រុងគួឡាឡាំពួ កាលពីថ្ងៃពុធសប្តាហ៍មុន (ទី២៧ ខែមីនា) ជាមួយនឹងកាំភ្លើង ៦ដើម និងគ្រាប់ ២០០គ្រាប់។ 

លោក Razarudin បាននិយាយថា នគរបាលកំពុងស៊ើបអង្កេតមូលហេតុរបស់ជនសង្ស័យ និងស្វែងរកជនសង្ស័យបន្ថែមទៀត ដើម្បីជួយដល់ការស៊ើបអង្កេតនេះ។

ជាមួយគ្នានេះ លោក Razarudin ក៏បានប្រាប់ដែរថា ប្រទេសម៉ាឡេស៊ីកំពុងធ្វើការដើម្បីរឹតបន្តឹងសន្តិសុខតាមព្រំដែន បន្ទាប់ពីមានការចាប់ខ្លួនជាច្រើន ដោយបាននិយាយបញ្ជាក់ពីការរិះគន់របស់ប្រទេសចំពោះសកម្មភាពរបស់អ៊ីស្រាអែល ក្នុងសង្រ្គាមនៅតំបន់ហ្កាហ្សា។ គួរបញ្ជាក់ថា ម៉ាឡេស៊ី និងអ៊ីស្រាអែល មិនមានទំនាក់ទំនងការទូតជាមួយគ្នាទេ៕