ប្រធានាធិបតីលោក Vladimir Putin (វ្ល៉ាឌីមៀរ ពូទីន) នៅថ្ងៃអង្គារ (ទី២ ខែមេសា) នេះ បាននិយាយថា រុស្ស៊ីនឹងស្វែងរកឲ្យឃើញអ្នកនៅពីក្រោយការវាយប្រហារ កាលពីខែមុន លើសាលប្រគុំតន្ត្រីក្បែរទីក្រុងមូស្គូ ដែលបានសម្លាប់មនុស្សយ៉ាងហោចណាស់ ១៤៤នាក់។
អំឡុងកិច្ចប្រជុំមួយរបស់មន្ត្រីក្រសួងមហាផ្ទៃ លោក ពូទីន បានប្រាប់ថា៖ «ច្បាស់ណាស់ យើងនឹងអាចចាប់អ្នកដែលបញ្ជាឲ្យមានការបាញ់ប្រហារនេះ នៅទីបំផុត។ យើងបានខាតបង់យ៉ាងធំធេងណាស់ ហើយការវិភាគស្ថានការណ៍ទាំងមូលត្រូវតែមានកម្មវត្ថុច្បាស់លាស់ និងប្រកបដោយវិជ្ជាជីវៈខ្ពស់បំផុត»។
គួរបញ្ជាក់ថា ក្រុមរដ្ឋឥស្លាមបានអះអាងទទួលខុសត្រូវចំពោះការវាយប្រហារនេះ ហើយមន្ត្រីសហរដ្ឋអាមេរិកនិយាយថា ពួកគេមានការស៊ើបការណ៍សម្ងាត់ដែលបង្ហាញថា ការបាញ់ប្រហារនេះត្រូវបានធ្វើឡើងដោយមែកធាងនៃបណ្តាញរបស់អាហ្វហ្គានីស្ថាន គឺរដ្ឋឥស្លាម Khorasan (ISIS-K)។ តែរុស្ស៊ីនិយាយថា ខ្លួនមានភស្តុតាងដែលថា ក្រុមអ្នកវាយប្រហារមានទំនាក់ទំនងជាមួយអ៊ុយក្រែន ដែលការលើកឡើងនេះត្រូវបានទីក្រុងគីវបដិសេធ ហើយសហរដ្ឋអាមេរិកបានច្រានចោលថា ជារឿងមិនសមហេតុសមផលនោះឡើយ៕