មនុស្សជាង៥៣.០០០នាក់ បានរត់ភៀសខ្លួនចេញពីរដ្ឋធានី របស់ប្រទេសហៃទី ក្នុងរយៈពេលតែ៣សប្ដាហ៍ប៉ុណ្ណោះនៃខែមីនា ខណៈជម្លោះរវាងក្រុមជនអន្ធពាលប្រដាប់អាវុធដ៏មានឥទ្ធិពល បានបង្កការបំផ្លាញដល់ជីវិតរបស់ជស៊ីវិល ស្របពេលក្រុមនេះកំពុងគ្រប់គ្រងផ្នែកដ៏ធំនៃរដ្ឋធានីនេះ ហើយក្រុមអ្នកនយោបាយមិនទាន់អាចទាញប្រទេសនេះចេញពីភាពវឹកវរបាននៅឡើយ ដោយសារតែមិនទាន់អាចជ្រើសរើសនាយករដ្ឋមន្ត្រីថ្មីបាន ក្រោយលោកនាយករដ្ឋមន្ត្រីអារីយ៉ែល ហង់រី ប្រកាសលាលែងពីតំណែង ។     

យោងតាមការប៉ាន់ប្រមាណរបស់អង្គការសហប្រជាជាតិ ដែលបានបញ្ចេញកាលពីថ្ងៃអង្គារ ទី២មីនា សប្ដាហ៍នេះ មនុស្សរាប់ម៉ឺននាក់ បានសម្រុកចាកចេញពីតំបន់រដ្ឋធានី ព័រ-អូ-ប្រាំង(Port-au-Prince) រវាងថ្ងៃទី៨មីនា និងថ្ងៃទី២៧មីនា ខណៈដែលអំពើហិង្សា បានរាលដាលជាថ្មីនៅថ្ងៃបុណ្យអ៊ីស្ទ័រចុងសប្ដាហ៍(Easter ) និងដើមខែមេសានេះ ។   

ប្រធានឃ្លាំមើលសិទ្ធិមនុស្សរបស់អង្គការសហប្រជាជាតិ លោក វ៉ូលគើ ទើក (Volker Turk) បាននិយាយកាលពីថ្ងៃអង្គារថា ទំហំនៃការរំលោភបំពានសិទ្ធិមនុស្សកំពុងកើតឡើយ៉ាងខ្លាំងនៅក្នុងប្រវត្តិសាស្ត្រសម័យទំនើបរបស់ប្រទេសហៃទី រួមទាំងការកាប់សម្លាប់ ការចាប់ជម្រិត និងអំពើហិង្សាផ្លូវភេទ ជាដើម ។ ជម្លោះនេះ បានបិទផ្លូវដឹកជញ្ជូនទំនិញ និងជំនជួយមនុស្សធម៌ដ៏សំខាន់ចូលទៅក្នុងរដ្ឋធានីនេះ ។    

យោងតាមអង្គការសហប្រជាជាតិ មនុស្សភាគច្រើន កំពុងធ្វើដំណើរទៅកាន់ឧបទ្វីបភាគខាងត្បូងរបស់ប្រទេសនេះ ដែលនៅតែកំពុងព្យាយាមងើបចេញពីគ្រោះមហន្តរាយរញ្ជួយដីដ៏ធ្ងន់ធ្ងរកាលពីឆ្នាំ២០២១ ។មនុស្ស៧ក្នុងចំណោម១០ នាក់ ដែលបានចាកចេញពីរដ្ឋធានីនេះកាលពីខែមីនា ត្រូវបានភៀសខ្លួនរួចទៅហើយ ដោយសារអំពើហិង្សារបស់ក្រុមជនប្រដាប់អាវុធអន្ធពាល៕