លោកនាយករដ្ឋមន្ត្រី Benjamin Netanyahu បាននិយាយកាលពីថ្ងៃអង្គារថា អ៊ីស្រាអែល​បាន​សម្លាប់​មនុស្ស ៧នាក់ដោយច្រឡំ ដែលធ្វើការឱ្យអង្គការជំនួយសប្បុរសធម៌ World Central Kitchen នៅក្នុងការវាយប្រហារតាមអាកាសនៅតំបន់ហ្កាហ្សា ហើយសហរដ្ឋអាមេរិក និងសម្ព័ន្ធ​មិត្ត​ផ្សេង​ទៀត បានអំពាវនាវឱ្យពន្យល់ ស្របពេលមានការថ្កោលទោសដ៏ទូលំទូលាយ។      

យោធាអ៊ីស្រាអែលបានសម្តែង ការសោកស្ដាយដោយស្មោះ ចំពោះឧបទ្ទវហេតុនេះ ដែលបាន​បង្កើន​សម្ពាធ​ជាអន្តរជាតិ សម្រាប់​ជំហាន​នានា​ដើម្បី​បន្ធូរ​បន្ថយ​ស្ថានការណ៍មនុស្សធម៌​ដ៏មហន្តរាយ​នៅ​តំបន់ហ្កាហ្សា ជិតប្រាំមួយខែ ចូលទៅក្នុងដែនដីរងការ​ឡោមព័ទ្ធ​ដោយ​អ៊ីស្រាអែល និងការលុកលុយតំបន់ប៉ាឡេស្ទីន។ 

ការវាយប្រហារតាមអាកាសលើក្បួនរថយន្តរបស់ World Central Kitchen បាន​សម្លាប់​ពលរដ្ឋ​អូស្ត្រាលី អង់គ្លេស និងប៉ូឡូញ ព្រមទាំងប៉ាឡេស្ទីន និងពលរដ្ឋ សហរដ្ឋអាមេរិក និង​កាណាដា។ យោធា​អ៊ីស្រាអែលបានប្ដេជ្ញាបើកការស៊ើបអង្កេតដោយស្ថាប័នឯករាជ្យ ប្រកបដោយវិជ្ជាជីវៈ និង​ជំនាញ។ យោងតាមអង្គការសហប្រជាជាតិ មានបុគ្គលិកមនុស្សធម៌ ១៩៦ នាក់​ត្រូវ​បាន​សម្លាប់​នៅ​ហ្កាហ្សាចា​ប់តាំងពីខែតុលាមក ហើយក្រុមហាម៉ាស ធ្លាប់បានចោទ​ប្រកាន់​អ៊ីស្រាអែល​ថា​បាន​ដាក់​គោល​ដៅ​លើក្រុមចែកចាយជំនួយ។

ការិយាល័យរបស់លោកនាយករដ្ឋមន្ត្រីអង់គ្លេស Sunak បាននិយាយនៅក្នុង​ការ​អំពាវនា​វមួយ​កាល​ពី​ថ្ងៃអង្គារ ថា នាយករដ្ឋមន្ត្រីអង់គ្លេស Rishi Sunak បានប្រាប់លោកនាយករដ្ឋមន្ត្រី Netanyahu ថា ចក្រភ​ពអង់គ្លេស​មាន​ការ​រន្ធត់​ចិត្ត​ចំពោះ​ការ​ស្លាប់​ដែល​រួមមាន​ជនជាតិ​អង់​គ្លេស​បីនាក់ ហើយទាមទារឱ្យមានការស៊ើបអង្កេតដោយឯករាជ្យដ៏ហ្មត់ចត់ និងតម្លាភាពបំផុត។  

នាយករដ្ឋ​មន្ត្រីអូស្ត្រាលី លោក Anthony Albanese បាននិយាយថា លោកបានបង្ហាញ ការខឹង​សម្បារ ​និងការព្រួយបារម្ភ ទៅកាន់លោក Netanyahu នៅក្នុងការអំពាវនាវ​ដាច់​ដោយ​ឡែកមួ​យ​។ ​សហរដ្ឋអាមេរិក ដែលជាសម្ព័ន្ធមិត្តជិតស្និទ្ធបំផុតរបស់អ៊ីស្រាអែល បាននិយាយថា មិន​មាន​ភ័ស្តុតាង​ដែល​អ៊ីស្រាអែលដាក់គោលដៅដោយចេតនាដល់បុគ្គលិកផ្តល់ជំនួយនោះទេ ប៉ុន្តែថា មានការ​ខឹងសម្បារចំពោះការស្លាប់របស់បុគ្គលិកចែកចាយជំនួយទាំងនោះ ហើយអ៊ីស្រាអែល​មាន​កាតព្វកិច្ច​ធានា​ការផ្ដល់ផ្នែកសន្តិសុខដល់បុគ្គលិកជំនួយនៅក្នុងតំបន់ហ្កាហ្សា៕