អង្គការ ផ្ទះបាយកណ្ដាលរបស់ពិភពលោក (WCK) កាលពីថ្ងៃអង្គារ (០២ មេសា) បានប្រកាសផ្អាកជាបន្ទាន់នូវប្រតិបត្តិការជំនួយរបស់ខ្លួននៅក្នុងតំបន់ហ្កាហ្សា បន្ទាប់ពីមានការសម្លាប់បុគ្គលិកប្រាំពីរនាក់នៅក្នុងការវាយប្រហារតាមអាកាសរយៈពេលមួយយប់របស់អ៊ីស្រាអែល។

អង្គការមិនរកប្រាក់ចំណេញមួយនេះបាននិយាយនៅក្នុងសេចក្តីថ្លែងការណ៍មួយ ដែលបានចេញផ្សាយនៅលើគេហទំព័រផ្លូវការថា ខ្លួនមានការភ្ញាក់ផ្អើលយ៉ាងខ្លាំងក្នុងការបញ្ជាក់អំពីការសម្លាប់សមាជិកប្រាំពីរនាក់នៃក្រុមរបស់ខ្លួននៅក្នុងការវាយឆ្មក់របស់កងទ័ពអ៊ីស្រាអែលលើតំបន់ហ្កាហ្សា។ ទីភ្នាក់ងារនេះបានបញ្ជាក់ថា ក្រុមជំនួយដែលត្រូវបានកំណត់គោលដៅនោះ «គឺកំពុងធ្វើដំណើរនៅក្នុងតំបន់គ្មានយោធានៅក្នុងរថយន្តពាសដែកពីរគ្រឿងដែលមានស្លាកសញ្ញារបស់អង្គការ»។

សេចក្តីថ្លែងការណ៍បន្ថែមថា ក្រុមនេះត្រូវបានគេវាយប្រហារខណៈពេលដែលចាកចេញពីឃ្លាំងជំនួយក្នុងក្រុង ដឺ អាល់បាឡាស (Deir al-Balah) បន្ទាប់ពីបានផ្ទុកជំនួយស្បៀងនៅទីនោះ ទោះបីជាមានការសម្របសម្រួលការចល័តជាមួយកងកម្លាំងការពារអ៊ីស្រាអែលក៏ដោយ ដោយបានជំរុញឱ្យអ៊ីស្រាអែលបញ្ឈប់ «ការសម្លាប់ដោយមិនរើសមុខនេះ» នៅក្នុងតំបន់ហ្កាហ្សា។

យោងតាម WCK បានឱ្យដឹងថា បុគ្គលិកទាំងប្រាំពីរនាក់នោះមកពីប៉ាឡេស្ទីន អូស្ត្រាលី ប៉ូឡូញ ចក្រភពអង់គ្លេស និងជាពលរដ្ឋសញ្ជាតិពីររបស់កាណាដា និងសហរដ្ឋអាមេរិក។ WCK គឺជាអង្គការមិនរកប្រាក់កម្រៃ និងជាអង្គការមិនមែនរដ្ឋាភិបាល ដែលប្រតិបត្តិការរបស់ខ្លួនរួមមានការផ្តល់អាហារនៅពេលមានគ្រោះមហន្តរាយធម្មជាតិ៕