មន្ត្រីការទូតប្រាំរូបបាននិយាយកាលពីថ្ងៃអង្គារ (០២ មេសា) ថា ប្រធានអង្គការណាតូ (NATO) លោក ជេនស៍ ស្តុលថិនប៊ឺក (Jens Stoltenberg) បានស្នើកញ្ចប់ថវិកាចំនួន ១០០ ពាន់លានអឺរ៉ូ (១០៧ ពាន់លានដុល្លារ) ដែលជាកញ្ចប់ជំនួយយោធារយៈពេល ៥ ឆ្នាំដល់ប្រទេសអ៊ុយក្រែន ដែលនឹងផ្តល់ឱ្យសម្ព័ន្ធយោធាលោកខាងលិចមួយនេះនូវតួនាទីដោយផ្ទាល់បន្ថែមទៀតក្នុងការផ្តល់ការគាំទ្រដល់ទីក្រុងគីវ។

ក្រុមអ្នកការទូតបាននិយាយថា នៅក្រោមផែនការនោះ ណាតូនឹងទទួលការងារសម្របសម្រួលមួយចំនួនពីក្រុមចម្រុះដែលដឹកនាំដោយសហរដ្ឋអាមេរិក ដែលគេស្គាល់ថាជាក្រុម រ៉ែមស្តែន (Ramstein) ដែលជាជំហានមួយដែលត្រូវបានធ្វើឡើងជាផ្នែកមួយដើម្បីការពារប្រឆាំងនឹងការកាត់បន្ថយការគាំទ្រណាមួយរបស់សហរដ្ឋអាមេរិក ប្រសិនបើលោក ដូណាល់ ត្រាំ (Donald Trump) ត្រឡប់មកកាន់តំណែងសេតវិមានវិញ។

សំណើនេះត្រូវបានគេរំពឹងថានឹងត្រូវបានពិភាក្សានៅក្នុងកិច្ចប្រជុំរយៈពេលពីរថ្ងៃនៃរដ្ឋមន្ត្រីការបរទេសណាតូនៅថ្ងៃពុធ (០៣ មេសា) នេះនិងថ្ងៃព្រហស្បតិ៍ (០៤ មេសា) ដោយមានគោលបំណងបញ្ចប់កញ្ចប់មួយទាន់ពេលវេលាសម្រាប់កិច្ចប្រជុំកំពូលរបស់អង្គការណាតូ ក្នុងទីក្រុងវ៉ាស៊ីនតោន ក្នុងខែកក្កដា។

រហូតមកដល់ពេលនេះ អង្គការណាតូ ជាអង្គការមួយបានដាក់កម្រិតខ្លួនឯងដោយផ្ដល់តែជំនួយមិនបង្កគ្រោះថ្នាក់ដល់ស្លាប់សម្រាប់អ៊ុយក្រែនប៉ុណ្ណោះ ដោយសារការភ័យខ្លាចថាតួនាទីផ្ទាល់អាចបង្កឱ្យមានភាពតានតឹងជាមួយរុស្ស៊ីកើនឡើង។ ប៉ុន្តែអ្នកការទូតបាននិយាយថា មានទស្សនៈកាន់តែច្រើនឡើងនៅក្នុងអង្គការ ណាតូ ដែលថាពេលវេលាបានមកដល់ហើយក្នុងការផ្តល់ជំនួយផ្នែកយោធាដល់អ៊ុយក្រែន លើការឈរជើងរយៈពេលវែងដែលមាននិរន្តរភាពជាងមុន៕