សហរដ្ឋអាមេរិក បានព្រមានប្រទេសអ៊ីរ៉ង់កាលពីថ្ងៃអង្គារ កុំឱ្យសងសឹកមកលើខ្លួនចំពោះការវាយប្រហារលើបរិវេណស្ថានទូតអ៊ីរ៉ង់ នៅក្នុងប្រទេសស៊ីរី ដោយនិយាយទៅកាន់ក្រុមប្រឹក្សាសន្តិសុខអង្គការសហប្រជាជាតិថា វាពុំមានការព្រមានជាមុនអំពីការវាយប្រហារដែលទីក្រុងតេអេរ៉ង់ បានស្តីបន្ទោសទៅលើសម្ព័ន្ធមិត្តរបស់ក្រុងវ៉ាស៊ីនតោន។

ការវាយប្រហារកាលពីថ្ងៃចន្ទ ដែលប្រទេសអ៊ីរ៉ង់ បាននិយាយថាបានសម្លាប់ឧត្តមសេនីយ៍ពីររូបរបស់ខ្លួន និងទីប្រឹក្សាយោធាចំនួនប្រាំនាក់ គឺជាការវាយប្រហារមានទំហំធំមួយលើផលប្រយោជន៍របស់អ៊ីរ៉ង់ នៅក្នុងប្រទេសស៊ីរី ជាកន្លែងដែលអ៊ីស្រាអែល បានបង្កើនយុទ្ធនាការជាយូរមកហើយ ប្រឆាំងប្រទេសអ៊ីរ៉ង់។

លោក Robert Wood ឯកអគ្គរដ្ឋទូតរងរបស់សហរដ្ឋអាមេរិក ប្រចាំនៅអង្គការសហប្រជាជាតិ បាននិយាយថា យើងនឹងមិនស្ទាក់ស្ទើរនោះទេ ក្នុងការការពារបុគ្គលិករបស់យើង ហើយធ្វើការព្រមានជាមុនចំពោះអ៊ីរ៉ង់ និងភ្នាក់ងារតំណាងរបស់ខ្លួន កុំឱ្យទាញយកប្រយោជន៍ពីស្ថានភាពនេះ ហើយ បន្តវាយប្រហារលើបុគ្គលិកអាមេរិក ដែលយើងមិនជាប់ពាក់ព័ន្ធ។

លោក Wood បាននិយាយថា ទីក្រុងវ៉ាស៊ីនតោន មិនទាន់មានការបញ្ជាក់អំពីស្ថានភាពនៃអគារដែលត្រូវបានវាយប្រហារនៅទីក្រុងដាម៉ាស់ នៅឡើយទេ។ លោកបាននិយាយថា បេសកកម្មការទូត និងទ្រព្យសម្បត្តិរបស់ពួកគេ ព្រមទាំងលំនៅឋានការទូតផ្លូវការ ត្រូវតែបានការពារ ជាពិសេសនៅពេលមានជម្លោះប្រដាប់អាវុធ។

អ៊ីរ៉ង់ បាននិយាយទៅកាន់ក្រុមប្រឹក្សាសន្តិសុខដែលមានសមាជិកចំនួន ១៥រូប ថា ខ្លួនរក្សាសិទ្ធិ ឆ្លើយតបយ៉ាងម៉ឺងម៉ាត់ ចំពោះការវាយប្រហារ ដោយចោទប្រកាន់អ៊ីស្រាអែលថា បានបំពានលើធម្មនុញ្ញអង្គការសហប្រជាជាតិ ច្បាប់អន្តរជាតិ និងការបំពានលើបរិវេណការទូត និងស្ថានកុងស៊ុល។