ក្រុមយុវជនសង្គមស៊ីវិល រួមក្រុមសេដ្ឋកិច្ចក្រៅប្រព័ន្ធ បានចេញសេចក្ដីថ្លែងការណ៍រួមអបអរសាទរ សម្តេចអគ្គមហាសេនាបតីតេជោ ហ៊ុន សែន ជាប់ឆ្នោតជាប្រធានព្រឹទ្ធសភា នីតិកាលទី៥។ ក្រុម​យុវជន​ទាំងអស់គ្នាមានសេចក្តីសង្ឃឹមយ៉ាងមុតមាំថា វត្តមានសម្តេច​តេជោ​ចូលកាន់​តំណែង​ជា​ប្រធាន​ព្រឹទ្ធសភា គឺពិតជាបានជួយ​សម្រួល​ឱ្យ​ដំណើរ​ការ​កំណែ​ទម្រង់​នានា​ជា​ពិសេសការកែទម្រង់ច្បាប់និងបន្តពង្រឹងលទ្ធិប្រជាធិបតេយ្យនៅកម្ពុជា។

លោក ហេង សំណាង ប្រធានក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធ បាន​បង្ហាញ​ក្តី​សោមនស្សរីករាយឥតឧប្បមា ដែលសម្តេចតេជោ ហ៊ុន សែន ត្រូវបានជាប់ឆ្នោត​ជា​ប្រធាន​ព្រឹទ្ធសភា នីតិកាលទី៥ ដោយមានសំឡេងបោះឆ្នោតគាំទ្រពីសមាជិក សមាជិកាព្រឹទ្ធសភា ចំនួន ៦២ លើ ៦២ សំឡេង ក្នុងសម័យប្រជុំដំបូងព្រឹទ្ធសភា នីតិកាលទី៥ នៅព្រឹកថ្ងៃទី៣ ខែមេសា ឆ្នាំ២០២៤នេះ។

លោកថ្លែងថា វត្តមានដ៏ខ្ពស់ខ្ពស់របស់សម្តេចតេជោ ដែលបានបូជាសាច់​ស្រស់​ឈាម​ស្រស់​ដើម្បី​បុព្វហេតុ​ជាតិមាតុភូមិកន្លងមក ចំពោះការខិតខំប្រឹងប្រែងឥតឈប់ឈរទាំងយប់ទាំងថ្ងៃ បានកែ​ប្រែ​មុខ​មាត់កម្ពុជាជាប្រវត្តិសាស្ត្រ ងើបមុខលើឆាកអន្តរជាតិ បង្ហាញពីភាព​រីក​ចម្រើន​លើ​គ្រប់​វិស័យ រក្សាបាននូវសុខសន្តិភាព ឯករាជ្យភាព អធិបតេយ្យ បូរណភាពទឹកដី យ៉ាងពេញលេញ។     

ក្រុមយុវជនសង្គមស៊ីវិល រួមក្រុមសេដ្ឋកិច្ចក្រៅប្រព័ន្ធ ទាំងអស់គ្នា បាន​បង្ហាញ​ក្តី​សង្ឃឹ​ម​យ៉ាង​មុត​មាំ​ចំពោះវត្តមានសម្តេចតេជោចូលកាន់តំណែងជាប្រធានព្រឹទ្ធសភា និងជាប្រមុខរដ្ឋស្តីទី គឺ​ពិត​ជា​បាន​ជួយសម្រួលឱ្យដំណើរការកំណែរទម្រង់នានា ជាពិសេសការកែទម្រង់ច្បាប់ ដើម្បីជំរុញ​កម្ពុជា​ឱ្យ​ក្លាយ​ជាប្រទេសមានចំណូលខ្ពស់ និងជឿនលឿនលើ​គ្រប់​វិស័យ​យ៉ាង​សុខសាន្ត​តទៅ​មុខទៀត​៕ អត្ថបទ៖វ៉ន ដារ៉ា