អ្នកនាំពាក្យរបស់សេតវិមានលោក John Kirby បាននិយាយថា កម្មវិធី TikTok និងម្ចាស់របស់កម្មវិធីនេះ ត្រូវបានលើកឡើងនៅក្នុងការសន្ទនាតាមទូរស័ព្ទរវាងប្រធានាធិបតីសហរដ្ឋអាមេរិក លោក Joe Biden និងសមភាគីចិនរបស់លោក លោក Xi Jinping កាលពីថ្ងៃអង្គារ ហើយលោក Biden បានលើកឡើងពីការព្រួយបារម្ភរបស់សហរដ្ឋអាមេរិក អំពីកម្មសិទ្ធិរបស់កម្មវិធីនេះ។

កាលពីខែមីនា សភាសហរដ្ឋអាមេរិក បានបោះឆ្នោតយ៉ាងលើសលប់ដើម្បីអនុម័តសេចក្តីស្នើច្បាប់ដែលផ្តល់ឱ្យក្រុមហ៊ុន ByteDance ជាក្រុមហ៊ុនចិនគ្រប់គ្រងកម្មវិធី TikTok រយៈពេលប្រហែលប្រាំមួយខែដើម្បីលក់កម្មវិធីនេះមកឲ្យសហរដ្ឋអាមេរិក បើមិនដូច្នេះប្រឈមនឹងការហាមឃាត់ ដោយលើកឡើងពីកង្វល់សន្តិសុខជាតិ។

សមាជិកព្រឹទ្ធសភា នៅតែមិនទាន់សម្រេចថាត្រូវបន្តដំណើរការយ៉ាងណានោះទេ។ លោក Biden បាននិយាយថា លោកនឹងចុះហត្ថលេខាលើសេចក្តីស្នើច្បាប់បែបនេះ ប្រសិនបើច្បាប់នេះទៅដល់តុរបស់លោក។

ប្រធានាធិបតី លោក Biden បាននិយាយថា ទំនាក់ទំនងរវាងសហរដ្ឋអាមេរិក និងចិន គឺជាទំនាក់ទំនងដែលមានសារៈសំខាន់បំផុតលើពិភពលោក។ វឌ្ឍនភាពក្នុងទំនាក់ទំនង ចាប់តាំងពីកិច្ចប្រជុំនៅទីក្រុងសាន់ហ្វ្រាន់ស៊ីស្កូ សហរដ្ឋអាមេរិក បង្ហាញថា ភាគីទាំងពីរអាចជំរុញកិច្ចសហប្រតិបត្តិការ ខណៈមានការទទួលខុសត្រូវក្នុងការគ្រប់គ្រងខុសៗគ្នា។

នៅក្នុងកិច្ចសន្ទនានេះ ប្រធានាធិបតីទាំងពីរ ក៏បានផ្លាស់ប្តូរយោបល់គ្នាស្តីពីវិបត្តិនៅអ៊ុយក្រែន និងស្ថានភាពស្តីពីឧបទ្វីបកូរ៉េ និងបញ្ហាដ៏ទៃទៀតជាច្រើន។