សេតវិមាន កាលពីថ្ងៃអង្គារ (០២ មេសា) បានបញ្ជាឱ្យអង្គការ ណាសា (NASA) បង្កើតស្តង់ដារបង្រួបបង្រួមនៃពេលវេលាសម្រាប់ឋានព្រះចន្ទ និងកញ្ចុំផ្កាយផ្សេងទៀត ខណៈដែលសហរដ្ឋអាមេរិក មានបំណងកំណត់បទដ្ឋានអន្តរជាតិក្នុងលំហ ស្របពេលមានការប្រណាំងប្រជែងរុករកព្រះចន្ទ ដែលកំពុងកើនឡើងក្នុងចំណោមប្រទេសនានា និងក្រុមហ៊ុនឯកជន។

ប្រធានការិយាល័យគោលនយោបាយវិទ្យាសាស្ត្រ និងបច្ចេកវិទ្យារបស់សេតវិមាន (OSTP) យោងតាមអនុស្សរណៈដែលឃើញដោយទីភ្នាក់ងារព័ត៌មាន រ៉យទ័រ បានណែនាំឱ្យទីភ្នាក់ងារអវកាសនេះធ្វើការជាមួយផ្នែកផ្សេងទៀតនៃរដ្ឋាភិបាលសហរដ្ឋអាមេរិក ដើម្បីបង្កើតផែនការមួយនៅចុងឆ្នាំ ២០២៦ សម្រាប់ការកំណត់អ្វីដែលខ្លួនហៅថា ពេលវេលាសម្របសម្រួលរបស់ព្រះចន្ទ (LTC)។

កម្លាំងទំនាញខុសគ្នា និងកត្តាដែលមានសក្តានុពលផ្សេងទៀតនៅលើព្រះចន្ទ និងលើកញ្ចុំផ្កាយផ្សេងទៀត ផ្លាស់ប្តូររបៀបដែលពេលវេលាលាតសន្ធឹង ទាក់ទងទៅនឹងរបៀបដែលដំណើរពេលវេលាត្រូវបានគេយល់ឃើញនៅលើផែនដី។ ក្នុងចំណោមគោលដៅផ្សេងទៀត គម្រោងពេលវេលាសម្របសម្រួល LTC នេះ នឹងផ្តល់នូវស្តង់ដាររក្សាពេលវេលាសម្រាប់យានអវកាសព្រះចន្ទ និងផ្កាយរណបដែលទាមទារភាពជាក់លាក់ខ្លាំងសម្រាប់បេសកកម្មរបស់ពួកគេ។

អនុស្សរណៈនោះបង្ហាញថា សម្រាប់មនុស្សម្នាក់នៅលើឋានព្រះចន្ទ នាឡិកាពេលវេលាដែលមានមូលដ្ឋានលើផែនដីនឹងហាក់ដូចជាបាត់បង់ជាមធ្យម ៥៨,៧ មីក្រូវិនាទីក្នុងមួយថ្ងៃ ហើយនាំមកជាមួយបម្រែបម្រួលតាមកាលកំណត់ផ្សេងទៀត ដែលនឹងបន្តផ្ដល់ភាពខុសគ្នានៃម៉ោងនៅឋានព្រះចន្ទ និងម៉ោងនៅលើផែនដី៕