ទូរទស្សន៍រដ្ឋ Nile TV បានរាយការណ៍ថា លោក Abdel-Fattah al-Sisi បានស្បថចូលកាន់តំណែងតាមរដ្ឋធម្មនុញ្ញ កាលពីថ្ងៃអង្គារ ជាប្រធានាធិបតីរបស់ប្រទេសអេហ្ស៊ីប សម្រាប់អាណត្តិទី ៣ ជាប់ៗគ្នា ដោយកាន់តំណែងរហូតដល់ឆ្នាំ ២០៣០។

នៅក្នុងពិធីមួយដែលត្រូវបានចាក់ផ្សាយតាមទូរទស្សន៍ ធ្វើឡើងនៅទីស្នាក់ការរបស់សភាប្រទេសអេហ្ស៊ីប ក្នុងរដ្ឋធានីរដ្ឋបាលថ្មី លោក SiSi បានប្តេជ្ញាថានឹងការពារប្រព័ន្ធសាធារណរដ្ឋ គោរពរដ្ឋធម្មនុញ្ញ និងច្បាប់ ការពារផលប្រយោជន៍ប្រជាជន និងការពារឯករាជ្យជាតិ និងឯកភាពជាតិ។

ប្រធានាធិបតីអេហ្ស៊ីប បាននិយាយនៅក្នុងសុន្ទរកថាបន្ទាប់ពីការធ្វើសច្ចាប្រណិធានថា លោកបញ្ជាក់ជាថ្មីនូវការប្តេជ្ញាចិត្តរបស់លោក ក្នុងការបន្តដំណើរកសាងប្រទេសជាតិ និងបំពេញនូវបំណងប្រាថ្នារបស់ប្រជាជនអេហ្ស៊ីប ក្នុងការកសាងរដ្ឋប្រជាធិបតេយ្យបែបទំនើប។

លោក Sisi បានទទួលជ័យជម្នះនៅក្នុងការបោះឆ្នោតប្រធានាធិបតីអេហ្ស៊ីបឆ្នាំ ២០២៤ កាលពីខែធ្នូ ឆ្នាំ ២០២៣ ដោយទទួលបានសំឡេងគាំទ្រចំនួន ៨៩,៦ ភាគរយ។

យោងតាមរដ្ឋធម្មនុញ្ញប្រទេសអេហ្ស៊ីប បានឲ្យដឹងថា ដោយបានបង្កើតឡើងក្នុងឆ្នាំ ២០១៤ ជាមួយនឹងការធ្វើវិសោធនកម្មនៅឆ្នាំ ២០១៩ លោកនឹងកាន់តំណែងជាប្រធានាធិបតីរយៈពេល ៦ ឆ្នាំដែលមានចាប់ពីឆ្នាំ ២០២៤ ដល់ឆ្នាំ ២០៣០ ។

លោក បានជាប់ឆ្នោតជាប្រធានាធិបតីអេហ្ស៊ីបជាលើកដំបូងសម្រាប់រយៈពេល ៤ ឆ្នាំនៅក្នុងឆ្នាំ ២០១៤ ហើយបានជាប់ឆ្នោតថ្មីសម្រាប់អាណត្តិទីពីរនៅក្នុងឆ្នាំ ២០១៨ ។