ក្រសួងមុខងារសាធារណៈ ក្នុងការបំពេញការងាររបស់ខ្លួន សម្រេច​បាននូវ​លទ្ធផល​ជា​បន្ត​បន្ទាប់​ក្នុង​ក្របខណ្ឌ នៃការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ។ ជាជោគ​ជ័យ​ធំ​ដែល​ទទួ​លបានការកោតសសើរនោះគឺ ការប្រឡងជ្រើសរើសមន្ត្រី បម្រើការងារ​ក្នុង​រដ្ឋបាល​សាធារណៈ​នៅ​តាមក្រសួងស្ថាប័ន ក្នុងរយៈពេលប៉ុន្មានខែមកនេះ។ នេះជាការបញ្ជាក់​ក្នុង​សន្និបាត​បូក​សរុបការងារប្រចាំឆ្នាំ ២០២៣ និងលើកទិសដៅការងារឆ្នាំ ២០២៤ របស់​ក្រសួង​មុខងារសាធារណៈ។

ឯកឧត្តម ឧបនាយករដ្ឋមន្ត្រី ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បាន​លើកឡើងក្នុងឱកាសប់កសន្និបាតថា ក្រសួងមុខងារ​សាធារ​ណៈ​បាន​បំពេញ​ការងារ និង​សម្រេច​បាន​លទ្ធផលជាបន្តបន្ទាប់ក្នុងក្របខណ្ឌនៃ ការអនុវត្តវិធានការគន្លឹះ​ក្នុង​ការ​កែ​ទម្រង់​រដ្ឋបាល​សាធារណៈ។ សមិទ្ធផលនោះគឺ ការកែលម្អការ​ជ្រើសរើស​មន្ត្រី​បម្រើ​ការងារ​ក្នុង​រដ្ឋបាល​សាធារណៈ។

ក្រសួង​មុខងារសាធារណៈបានដឹកនាំ និងសម្របសម្រួល​ការ​រៀបចំ​អនុក្រឹត្យ​ស្តីពី​ការ​ដាក់​ឱ្យ​អនុវត្ត​និយាមនីតិវិធីប្រតិបត្តិ សម្រាប់ការប្រឡងប្រជែងជ្រើសរើសមន្ត្រីរាជការស៊ីវិល ព្រម​ទាំង​បាន​ដឹកនាំ និងរៀបចំការប្រឡងប្រជែងជ្រើសរើសមន្ត្រីរាជការស៊ីវិលប្រកបដោយគុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព ស្របតាមប្រសាសន៍ដ៏ខ្ពង់ខ្ពស់របស់ សម្តេច​មហាបវរ​ធិបតី ហ៊ុន ម៉ាណែត នាយករដ្ឋមន្រ្តី គឺ “ជាប់ដោយមោទនៈ ធ្លាក់ដោយអស់ចិត្ត”។

ការ​ប្រឡងប្រជែងជ្រើសរើសមន្ត្រីរាជការស៊ីវិលត្រូវបានអនុវត្តចំនួន៥ លើករួចមកហើយ។ ការប្រឡងទាំងនោះរួមមាន ការប្រឡងជ្រើសរើសមន្ត្រីកសិកម្មឃុំ/សង្កាត់ចំនួន២៥០នាក់ ការជ្រើស​រើសគ្រូបង្រៀនឯកទេសអប់រំកាយ និងកីឡា ១០០ កន្លែង ការប្រឡង​ជ្រើស​រើស​មន្ត្រី​រាជការ​ឱ្យចូលបម្រើការងារ ក្នុងក្របខណ្ឌអង្គភាពប្រឆាំងអំពើពុករលួយ៣៣កន្លែង ការ​ជ្រើស​រើស​មន្ត្រី​រាជការឱ្យចូលបម្រើការងារ ក្នុងក្របខណ្ឌក្រសួងសាធារណការនិងដឹកជញ្ជូន ៩៩កន្លែង និង​ការ​ប្រឡងជ្រើសរើសមន្ត្រីរាជការឱ្យចូលបម្រើការងារក្នុងក្របខណ្ឌក្រសួងកសិកម្ម រុក្ខា​ប្រមាញ់ និងនេសាទចំនួន ៥២កន្លែង។

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ក៏បាន​បង្ហាញ​នូវ​មោទនភាព​ខ្ពស់​ចំពោះការបោះជំហានឆ្ពោះ ទៅមុខនៃវិស័យមុខងារសាធារណៈ ដែលបាន​និង​កំពុង​ចូលរួមចំណែកដល់ការលើកកម្ពស់អភិបាលកិច្ចក្នុងរដ្ឋបាលសាធារណៈ ដែលជា​មូលដ្ឋាន​ចាំ​បាច់ក្នុងការជំរុញល្បឿននៃការអភិវឌ្ឍសង្គម សេដ្ឋកិច្ចកម្ពុជា៕ អត្ថបទ៖ គឹមហុក