បណ្តាមូលដ្ឋានអាជីវកម្មនៅរាជធានីភ្នំពេញ និងសហការជាមួយអាជ្ញាធរមូលដ្ឋាន អនុវត្ត​ការណែនាំ និងបានរៀបចំតុបតែងមូលដ្ឋានអាជីវកម្មតាមបែបខ្មែរ អបអរសាទរបុណ្យចូលឆ្នាំថ្មី ប្រពៃណីខ្មែរ បន្ថែមលើកនេះ បណ្តាមូលដ្ឋានអាជីវកម្មថា នឹងឱកាសនោះបើកទ្វារប្រកបអាជីវកម្ម ផ្តល់​សេវាកម្មប្រកបដោយគុណភាព បដិសណ្ឋារកិច្ចល្អ និងបង្កើនសប្បាយរីករាយជូនភ្ញៀវគ្រប់រូប ។

លោកស្រី ប្រាក់ ម៉ាលី ចៅសង្កាត់បឹងកេងកង១ ថ្លែងប្រាប់ BTV ថ្ងៃទី៣ ខែមេសានេះថា អនុវត្ត​តាម​សេចក្តីណែនាំរដ្ឋបាលសាលារាជធានីភ្នំពេញ ក្រសួងទេសចរណ៍ មកដល់​ពេល​នេះ​រដ្ឋបាល​សង្កាត់​បានចុះណែនាំបណ្តាមូលដ្ឋានអាជីវកម្មរួចហើយ ដើម្បីផ្តល់សេវាល្អ កុំដំឡើងថ្លៃទំនិញ និង​សេវា​កម្មនានា ហើយអាជ្ញាធរមូលដ្ឋានផ្ទាល់ ក៏បានត្រៀមខ្លួន ចូលរួមថែរក្សាសន្តិសុខ រៀប​ចំ​សណ្តាប់​ធ្នាប់​តាមទីតាំងសប្បាយភាពនានា ដើម្បីបង្កលក្ខណៈពិធីបុណ្យចូលឆ្នាំថ្មី ប្រពៃណី​ខ្មែរ​មាន​ភាព​សប្បាយរីករាយ។

មូលដ្ឋានអាជីវកម្មទេសចរណ៍មួយចំនួន បានថ្លែងថា នៅថ្ងៃឈប់សំរាកបុណ្យចូលឆ្នាំថ្មី ប្រពៃណី​ខ្មែរ រយៈពេល៤ថ្ងៃខាងមុខនេះ អាជីវកម្មយើងមិនមានការសំរាកនោះទេ ហើយអំឡុងពេលនេះ មូលដ្ឋានអាជីវកម្មកំពុងបន្តរៀបចំតុបតែងលម្អរ ត្រៀមបន្តបើកទ្វារផ្តល់សេវាល្អជូនប្រជាពលរដ្ឋ និង​ភ្ញៀវទេសចរជាតិ-អន្តរជាតិទាំងអស់គ្នាឲ្យបានល្អប្រសើរ និងមិនដំឡើងថ្លៃមុខទំនិញ និង​សេវាកម្ម ក្នុងឱកាសថ្ងៃបុណ្យចូលឆ្នាំប្រពៃណីខ្មែរនោះទេ។

សូមបញ្ជាក់ថា ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីខ្មែរ ឆ្នាំរោង ដែល​នឹង​ឈាន​ចូល​មក​ដល់ថ្ងៃទី១៣ ខែមេសានេះ ក្រសួងទេសចរណ៍ បានណែនាំ​មន្ទីរ​ទេសចរ​ណ៍​គ្រប់​រាជ​ធានី​ខេត្ត ណែនាំមូលដ្ឋានអាជីវកម្មទេសចរណ៍ទាំងអស់ សហការ​ជាមួយ​អាជ្ញាធរ​មាន​សមត្ថកិច្ច​គ្រប់​ជាន់​ថ្នាក់ ដើម្បីធនាសន្តិសុខ សណ្តាប់ធ្នាប់ រក្សាភាពស្អាត រៀបចំតុបតែងទាំងក្នុង និងក្រៅ ដាក់​ទ​ង់ជាតិ ទង់សាសនា ដាក់រូបព្រះឆាយាល័ក្ខណ៍ ផ្តល់សេវាប្រកបគុណភាព រៀប​ចំ​តារាង​តម្លៃ​ទំនិញ និងសេវាកម្ម និងធនាការផ្តល់បដិសណ្ឋារកិច្ច ស្លៀកពាក់​បង្ហាញ​អត្ថ​សញ្ញាណ​ខ្មែរ​ឲ្យបាន​ល្អប្រសើរ​ជា​ដើម៕ អត្ថបទ ស៊ុម សុខជា