ប្រជាពលរដ្ឋបានសម្តែងការគាំទ្រចំពោះសម្តេចតេជោ ហ៊ុន សែន ក្លាយជាប្រធានព្រឹទ្ធសភា ដែលនឹងការពារផលប្រយោជន៍ជាតិ និងប្រជាជនជាចំបង។

ស្រប​ពេលថ្ងៃទី៣ ខែមេសា ឆ្នាំ២០២៤នេះសម្តេចអគ្គមហាសេនាបតីតេជោ ហ៊ុន សែន ជាប់​ជា​ប្រធាន​ព្រឹទ្ធសភា នីតិកាលទី៥ មានប្រជាពលរដ្ឋរស់នៅរាជធានីភ្នំពេញ បានប្រាប់ BTV ឱ្យ​ដឹង​ថា ការជាប់ជាប្រធានព្រឹទ្ធសភារបស់សម្តេចតេជោ ហ៊ុន សែន ពិតជាស័ក្តសម​ទៅ​នឹង​បទ​ពិសោធន៍​ការងារ និងភាពជាដឹកនាំពីពេលកន្លងទៅក្នុងនាមអតីតនាយករដ្ឋមន្រ្តី បានធ្វើ​ឱ្យ​ប្រទេស​កម្ពុជា​ទទួលបានសុខសន្តិភាព ស្ថិរភាព និងការរីកចម្រើនលើគ្រប់វិស័យ។

ប្រជា​ពលរដ្ឋលើកឡើងថា ក្នុងតួនាទីប្រធានព្រឹទ្ធសភា នីតិកាលទី៥នេះ សម្តេចតេជោ ហ៊ុន សែន នឹងកាន់តែធ្វើឱ្យប្រព័ន្ធដឹកនាំ និងគ្រប់គ្រងស្ថាប័នព្រឹទ្ធសភា ឬហៅ​ថា​សភា​ជាន់​ខ្ពស់​កាន់​តែ​មាន​ភាពរឹងមាំទៅលើច្បាប់ទាំងឡាយដែលបម្រើផលប្រយោជន៍សង្គមជាតិ និងប្រជាជន​ទាំងមូល​។

ប្រជាពលរដ្ឋមានជំនឿថា ព្រឹទ្ធសភា នីតិកាលទី៥ ក្រោមការដឹកនាំរបស់សម្តេចតេជោ ហ៊ុន សែន ដែល​តែងគិតគូរដល់វាសនាប្រទេសជាតិជាធំ ក្នុងការការពារ​បូរណភាពទឹកដី​នៃ​ព្រះរាជាណាចក្រ​កម្ពុជា​ នឹងរុញឱ្យកម្ពុជាបន្តឆ្ពោះទៅកាន់ស្ថិរភាព និងអភិវឌ្ឍជាតិឱ្យមានការរីកចម្រើន ព្រមទាំង​លើក​កម្ពស់​លទ្ធិប្រជាធិបតេយ្យ និងកិត្យានុភាពជាតិនៅលើឆាកអន្តរជាតិ។

សូមជម្រាបថា សម្តេចតេជោ ហ៊ុន សែន អតីតនាយករដ្ឋមន្រ្តី ត្រូវបាន​មជ្ឈដ្ឋាន​ទាំង​ក្នុង​និង​ប្រទេស​ទទួលស្គាល់ជាមគ្គុទេសឯក និងស្ថាបនិកបិតាសន្តិភាព ដែលបានលះបង់ និងពលីរំដោះ​ប្រទេស​ជាតិ​ពី​ប្រទេសញាំញីដោយសង្គ្រាមរាំរ៉ៃមកជាប្រទេសមានសុខសន្តិភាពពេញលេញ និង​ការ​អភិវឌ្ឍ​រហូតមកដល់ពេលបច្ចុប្បន្ន។ ក្នុងការដឹកនាំរាជរដ្ឋាភិបាល ចាប់តាំងពីនីតិកាលទី១ ដល់​នីតិកាលទី៦ សម្តេចតេជោ ហ៊ុន សែន បានផ្តួចផ្តើម និងផ្តល់​អនុសាសន៍​រៀបចំ​តាក់តែង​ច្បាប់​ជា​ច្រើន​ដែលតម្កល់ និងធានាដល់ស្ថិរភាពជាតិ និងសេដ្ឋកិច្ចជាតិ រួមទាំង​ប្រជាពលរដ្ឋ​ឱ្យ​ប្រសើរ​ឡើងជាបន្តបន្ទាប់៕ អត្ថបទ សេក ឧត្តម