យានដ្ឋានដែលមានមូលដ្ឋាននៅប្រទេសជប៉ុនតាំងពីឆ្នាំ១៩៧១ បានប្រកាស​សម្ពោធ​រោងជាង​ជួស​ជុលរថយន្ត ហ្ស៊ី វ៉េ សេ (JVC) ដែលបានកែលំអថ្មី ក្រោមកិច្ចសហប្រតិបត្តិការ រវាង​វិទ្យាស្ថាន​បច្ចេកទេស ហ្ស៊ី វ៉េ សេ និងក្រុមហ៊ុន ហ៊ីការី ជីដូសា ក្នុងការផ្តល់ការបណ្តុះបណ្តាល​ជំនាញ​វិជ្ជាជីវៈ​ដល់កម្ពុជាដើម្បីលើកកម្ពស់គុណភាពជីវិត។

ពិធីសម្ពោធរោងជាងនេះ បានប្រព្រឹត្តទៅនារសៀលថ្ងៃទី២ ខែមេសា ឆ្នាំ២០២៤នេះ ក្រោម​អធិបតី​ភាព ឯកឧត្តម ប៉ុក ប៉ាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ , ឯកឧត្តម អ៊ូអិណូ អាត់ស៊ូស៊ី (UENO Atsushi) ឯកអគ្គរាជទូតជប៉ុនប្រចាំកម្ពុជា និងឯកឧត្តម ហ្វូមិអាគិ តាកាហាហ្សិ (Fumiaki TAKAHASHI) ប្រធានសមាគមន៍ជប៉ុន-កម្ពុជា និង​ភ្ញៀវ​កិត្តិយស​ជា​ច្រើននាក់ផ្សេងទៀត។

លោក កេស៊ូគិ អូយ៉ា (Keisuke Oya ប្រធានក្រុមហ៊ុន ហ៊ីការី ជីដូសា នៅក្រោយកម្មវិធីនេះ បាន​ឲ្យ​ដឹង​ថា យានដ្ឋាននេះ នឹងចូលរួមផ្តល់ជាមូលដ្ឋានគ្រឹះនៃវិស័យយានយន្តនៅកម្ពុជា ដោយ​សារ​យានយន្ត​បាន​បំពាក់នូវឧបករណ៍ពិនិត្យរោគវិនិច្ឆ័យទំនើបក្នុងការពិនិត្យ ការថែទាំ និងជួស​ជុល​យាន​យន្ត​។ លោកបានប្តេជ្ញាចិត្ត ក្នុងការបន្តវិវត្តខ្លួននៅក្នុងបច្ចេកវិទ្យារថយន្ត ដើម្បីផ្តល់​បច្ចេក​ទេស​ជួស​ជុល​រថយន្តសម្រាប់ទីផ្សារកម្ពុជា។ លោកបានបន្តថា យានដ្ឋានថ្មីនេះ ក៏នឹងផ្តល់ជូន​សិស្សានុសិស្ស​នូវឱកាសការងារ ដើម្បីទទួលបានបទពិសោធន៍ល្អៗ និងជំនាញពិតប្រាកដ ដើម្បី​ពង្រឹង​ជំនាញ​មេកានិច និងត្រួសត្រាយផ្លូវ​ សម្រាប់​វិជ្ជាជីវៈ​ក្នុង​វិស័យ​ជួសជុល​រថយន្ត​ប្រកប​ដោយ​គុណ​ភាព​ខ្ពស់។

នៅក្នុងកម្មវិធីពិធីសម្ពោធរោងជាងនេះ ឯកឧត្តម ប៉ុក ប៉ាន់ រដ្ឋលេខាធិការក្រសួងការងារ និង​បណ្តុះ​បណ្តាលវិជ្ជាជីវៈ បានស្នើភាគីទាំងពីរ គឺវិទ្យាស្ថានបច្ចេកទេស ហ្ស៊ី វ៉េ សេ និងមជ្ឈ​មណ្ឌល​ថែទាំ​យាន​យន្ត ហ្ស៊ី វ៉េ សេ ត្រូវបន្តពង្រឹង និងពង្រីកកិច្ច​សហប្រតិបត្តិការ​ឲ្យ​កាន់​តែ​ទូលំ​ទូលាយ​បន្ថែម​ទៀត ដើម្បីគាំទ្រដល់វិស័យមេកានិចរថយន្តឲ្យបានយូវអង្វែង និងកាន់តែទូលំ​ទូលាយ ដើម្បីរួម​ចំណែក​ក្នុងការអភិវឌ្ឍមូលធនមនុស្សនៅកម្ពុជាប្រកបដោយសមត្ថភាព និងភាព​ប្រកួ​ត​ប្រជែង​ខ្ពស់។

យោងតាម លោក សិម សុរិន្ទ នាយកវិទ្យាស្ថានបច្ចេកទេស ហ្ស៊ី វ៉េ សេ បានបញ្ជាក់ឲ្យដឹងថា វិទ្យា​ស្ថាន​នេះចាប់ផ្តើមបង្កើតឡើងក្នុងឆ្នាំ១៩៨៩ ដោយអង្គការស្ម័គ្រចិត្តអន្តរជាតិជប៉ុន ហៅកាត់ JVC។ រហូតមកដល់សព្វថ្ងៃនេះ វិទ្យាស្ថានមានសិស្សរាប់សិបនាក់ ទទួលបានការ​បង្ហាត់​បង្រៀន​ពី​អ្នក​ជំនាញ​ជនជាតិជប៉ុនផ្នែកថែទាំរថយន្តគ្រប់ប្រភេទ។ បន្ថែមពីនេះ ក្រុមហ៊ុនក៏បាន​បញ្ជូន​យុវជន​ខ្មែរ​ជាច្រើននាក់ បានទៅធ្វើការនៅប្រទេសជប៉ុនផងដែរក្នុងវិស័យយានយន្តនេះ ដើម្បី​ចូល​រួម​កាត់​បន្ថយភាពក្រីក្រ និងអភិវឌ្ឍន៍សេដ្ឋកិច្ចកម្ពុជា៕