ប្រទេសរុស្ស៊ី បាននិយាយកាលពីថ្ងៃអង្គារថា ខ្លួនមានរឿងសំខាន់ ដើម្បីពិភាក្សាជាមួយក្រុមមេដឹកនាំតាលីបង់អាហ្វហ្គានីស្ថាន ហើយកំពុងធ្វើការ ដើម្បីដកក្រុមតាលីបង់ចេញពីបញ្ជីអង្គការភេរវកម្ម ដែលត្រូវបានហាមឃាត់។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានថា៖«នេះគឺជាប្រទេសដែលនៅជាប់នឹងយើង ហើយមធ្យោបាយមួយ ឬមធ្យោបាយផ្សេងទៀត ដែលយើងទាក់ទងជាមួយពួក គេ»។

«យើងត្រូវការដោះស្រាយបញ្ហាសំខាន់ៗ នេះក៏តម្រូវឲ្យមានការសន្ទនាដែរ ដូច្នេះក្នុងន័យនេះ យើងទាក់ទងជាមួយពួកគេ ដូចជាអ្នកដទៃទៀតដែរ ពួកគេ គឺជាអាជ្ញាធរពិតប្រាក នៅអាហ្វហ្គានីស្ថាន»។

លោក Peskov មិនបានបញ្ជាក់លម្អិតអំពី «បញ្ហាសំខាន់ៗទាំងនោះទេ» ប៉ុន្តែរុស្ស៊ី បានទទួលរងការវាយប្រហារដ៏សាហាវបំផុតរបស់ខ្លួនក្នុងរយៈពេល ២០ឆ្នាំ កាលពីខែមុន នៅពេលដែលខ្មាន់កាំភ្លើង បានវាយលុកសាលប្រគុំតន្ត្រីមួយ នៅខាងក្រៅទីក្រុងមូស្គូ ដោយបានសម្លាប់មនុស្សយ៉ាងហោចណាស់ ១៤៤នាក់។

ក្រុមសកម្មប្រយុទ្ធរដ្ឋឥស្លាម បានអះអាងទទួលខុសត្រូវ ហើយមន្ត្រីសហរដ្ឋអាមេរិក បាននិយាយថា ពួកគេមានព័ត៌មានចារកម្មថា វាជាបណ្តាញសាខារបស់អង្គការរដ្ឋឥស្លាម Khorasan ដែលជាអ្នកទទួលខុសត្រូវ។ រុស្ស៊ីបាននិយាយថា ខ្លួនក៏កំពុងស៊ើបអង្កេតលើទំនាក់ទំនងអ៊ុយក្រែនផងដែរ ជាអ្វីដែលទីក្រុងគីវ និងអាមេរិក បានច្រានចោលជាដាច់ខាត។

ក្រុមតាលីបង់ បានវិលចូលកាន់អំណាចក្នុងប្រទេសអាហ្វហ្គានីស្ថានវិញនៅឆ្នាំ ២០២១ បន្ទាប់ពីការដកទ័ពបរទេសដែលដឹកនាំដោយសហរដ្ឋអាមេរិក ប៉ុន្តែនៅតែមានរហូតមកដល់ពេលនេះ នៅក្នុងបញ្ជីអង្គការដែលរុស្ស៊ីកំណត់ថា ជាភេរវករ។