របាយការណ៍ថ្មីមួយដែលចេញផ្សាយកាលពីថ្ងៃអង្គារដោយធនាគារពិភពលោក និងអង្គការសហប្រជាជាតិបានឲ្យដឹងថា តម្លៃនៃការខូចខាតហេដ្ឋារចនាសម្ព័ន្ធសំខាន់ៗ នៅក្នុងតំបន់ហ្កាហ្សា ត្រូវបានប៉ាន់ប្រមាណថា មានចំនួនប្រហែល ១៨,៥ពាន់លានដុល្លារអាមេរិក។

របាយការណ៍ដែលត្រូវបានធ្វើឡើងដោយមានការគាំទ្រផ្នែកហិរញ្ញវត្ថុរបស់សហភាពអឺរ៉ុបបង្ហាញថា តម្លៃនៃការខូចខាត គឺស្មើនឹង ៩៧ភាគរយនៃផលិតផលក្នុងស្រុកសរុប (GDP)នៃតំបន់វេសបែង (West Bank) និងហ្កាហ្សាក្នុងឆ្នាំ ២០២២។

របាយការណ៍វាយតម្លៃការខូចខាតបណ្តោះអាសន្ន បានប្រើប្រាស់ប្រភពប្រមូលទិន្នន័យពីចម្ងាយ ដើម្បីវាស់វែងការខូចខាតដល់ហេដ្ឋារចនាសម្ព័ន្ធជាក់ស្តែង ក្នុងវិស័យសំខាន់ៗដែលកើតឡើង នៅចន្លោះខែតុលា ឆ្នាំ ២០២៣ ដល់ចុងខែមករា ឆ្នាំ ២០២៤។

របាយការណ៍នោះ រកឃើញថា ការខូចខាតរចនាសម្ព័ន្ធប៉ះពាល់ដល់គ្រប់វិស័យនៃសេដ្ឋកិច្ច។ លំនៅដ្ឋានមានចំនួន ៧២ភាគរយនៃការខូចខាតសរុប។ ហេដ្ឋារចនាសម្ព័ន្ធសេវាសាធារណៈដូចជាទឹក សុខភាព និងការអប់រំមាន ១៩ ភាគរយ ហើយការខូចខាតអគារពាណិជ្ជកម្ម និងឧស្សាហកម្មមានចំនួន ៩ភាគរយ។

របាយការណ៍ បានកត់សម្គាល់ថា កម្ទេចកម្ទីនិងបំណែកបាក់បែកប្រមាណ២៦លានតោន ត្រូវបានបន្សល់ទុក បន្ទាប់ពីការបំផ្លិចបំផ្លាញ ជាចំនួនដែលត្រូវបានគេប៉ាន់ប្រមាណថា ត្រូវចំណាយពេលច្រើនឆ្នាំ ដើម្បីយកចេញ។

របាយការណ៍នោះ ក៏បានបង្ហាញផងដែរថា ជាងពាក់កណ្តាលនៃចំនួនប្រជាជននៃតំបន់ហ្កាហ្សា គឺស្ថិតនៅស្ថានភាពគ្រោះទុរ្ភិក្ស ហើយប្រជាជនទាំងអស់ កំពុងជួបប្រទះនឹងអសន្តិសុខស្បៀងធ្ងន់ធ្ងរ និងកង្វះអាហារូបត្ថម្ភ។ មនុស្សជាងមួយលាននាក់ គ្មានផ្ទះសម្បែង ហើយ៧៥ភាគរយនៃប្រជាជន ត្រូវបានផ្លាស់ទីលំនៅ។