ភ្នំពេញ៖ ស្ថានទូតថៃប្រចាំកម្ពុជា ដឹកនាំដោយឯកឧត្តម ឈើតគៀត អត្ថាករ ឯកអគ្គ​រាជ​ទូត​ថៃ​ប្រចាំ​កម្ពុជា រួមជាមួយវិស័យឯកជន និងសហគមន៍ថៃនៅកម្ពុជា បានរៀបចំកម្មវិធីសប្បុរសធម៌ CSR ស្ថិតនៅស្រុកថាឡាបរិវ៉ាត់ ខេត្តស្ទឹងត្រែង ក្នុងគោលបំណងគាំទ្រការអភិវឌ្ឍសេដ្ឋកិច្ច និង​សង្គម​ថ្នាក់ក្រោមជាតិរបស់កម្ពុជា ដើម្បីឲ្យប្រជា​ជន​នៃប្រទេ​សទាំង​ពីរ​រីក​ចម្រើន​ទាំង​ផ្នែក​សេដ្ឋកិច្ច និងសង្គមព្រមៗគ្នា។

យោងតា​ផេកផ្លូវការរបស់ស្ថានទូតថៃប្រចាំកម្ពុជា បានឲ្យដឹងថា នៅថ្ងៃទី២ ខែមេសា ឆ្នាំ​២០២៤​កន្ល​ងទៅនេះ ស្ថានឯកអគ្គរាជទូតថៃ បានដឹកនាំក្រុមហ៊ុនឯកជនថៃ ដែល​កំពុង​បណ្ដាក់​ទុន​វិនិយោគ​នៅ​ក្នុងប្រទេសកម្ពុជាចំនួនជាង ១៥ក្រុមហ៊ុន ព្រមទាំងការិយាល័យ​ផ្សេងៗ​របស់​ស្ថាន​ទូត​ថៃ បានរួមគ្នាឧបត្ថម្ភគាំទ្រដល់សាលាបថមសិក្សាទួលត្នោតថ្មី រួមទាំង​មជ្ឈ​មណ្ឌល​សិក្សា​សហគមន៍​ទួល​ត្នោត​ថ្មី ដែលស្ថានទូតថៃតែងតែងរៀបចំឡើងជារៀងរាល់ឆ្នាំ តាមរយៈការបរិច្ចាគ​ជារបស់​របរ​ប្រើប្រាស់ចាំបាច់នៅក្នុងការអភិវឌ្ឍហេដ្ឋរចនាសម្ព័ន្ធនៅក្នុងខេត្ត និងថ្នាក់​ក្រោម​របស់​កម្ពុជា ព្រមទាំងបាននាំយកគ្រឿង​ឧបភោគ​បរិភោគ​ដែល​ចាំបាច់​ប្រគល់​ជូន​ដល់​សាលា​បឋម​សិក្សា​ និង​មជ្ឈមណ្ឌល​ខាងលើ ដើម្បីជាការលើកទឹកចិត្ត និងផ្តល់កំលាំងចិត្តជូន​ដល់​បុគ្គលិក​សិក្សា​ខាង​លើ។

ឯកឧត្តមឯកអគ្គរាជទូតថៃប្រចាំកម្ពុជា បានលើកឡើងក្នុងបណ្តាញសង្គមនេះថា គណៈ​ប្រតិភូ​ថៃសង្ឃឹម​យ៉ាងមុតមាំថា តាមរយៈកម្មវិធីសប្បុរសធម៌នេះ និងជួយបន្តនូវ​ទំនាក់​ទំនង​ល្អរ​វាង​ប្រជាជន​នៃប្រ​ទេសទាំងពីរ ឲ្យកាន់តែស្អិតរមួតខ្លាំងឡើងថែមទៀត ក៏ដូចជាជំរុញ​ការ​អភិវ​ឌ្ឍ​សេដ្ឋកិច្ច និងសង្គមទៅព្រមៗគ្នា។ លើសពីនេះ នឹងជាចំណែក​មួយ​នៅ​ក្នុង​ការ​ជួយ​គាំទ្រ​ដល់​សកម្មភាព​ការ​សិក្សាអប់រំរបស់ខេត្តស្ទឹងត្រែង អាចអភិវឌ្ឍធនធាន​មនុស្ស​ប្រកប​ដោយ​គុណភាព​ដែល​ជា​អនាគតដ៏សំខាន់របស់ខេត្ត បន្តទៀត។

បន្ថែមលើនេះ ឯកឧត្តម បានឆ្លៀតឱកាសចូលជួបសម្តែងការគួរសម និងពិភាក្សាការងារជាមួយ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង ដើម្បីស្វែងយល់​អំពី​សក្តា​នុភាព​នៃ​កិច្ច​សហប្រតិបត្តិការក្នុងវិស័យសេដ្ឋកិច្ច ពាណិជ្ជកម្ម វិនិយោគនិងទេសចរណ៍ រវាង​ថៃ​ និង​កម្ពុជា ឲ្យកាន់តែខ្លាំងឡើងថែមទៀត ដោយនៅក្នុងឱកាសនេះដែរ ឯកឧត្តមក៏​បាន​ដឹកនាំ​វិស័យ​ឯកជន​ថៃរួមគ្នាស្វែងយល់អំពីសក្តានុពលសេដ្ឋកិច្ច ពាណិជ្ជកម្ម និងទេសចរណ៍​នៅ​ក្នុង​ខេត្ត​ស្ទឹងត្រែង ព្រមទាំងបានធ្វើដំណើរទស្សនកិច្ចទំនប់វារីអគ្គសនីសេសានក្រោម ២ (Hydro Power Lower Sesan 2) និងបា​ន​ធ្វើ​ដំណើរ​ទេសចរណ៍​ទៅ​កាន់​សហគមន៍​អេកូ​ទេសចរណ៍​កោះ​ហាន​ផង​ដែរ (Koh Han Community Based Ecotourism)៕