ភ្នំពេញ ៖ នៅព្រឹកថ្ងៃទី៣ ខែមេសា ឆ្នាំ២០២៤នេះ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា បានអញ្ជើញជួបសំណេះសំណាល ជាមួយលោកស្រី ឌីណា ហ្វីស័រ ប្រធានបេសកកម្ម គណៈកម្មាធិការអន្តរជាតិ នៃកាកបាទក្រហម ហៅកាត់ថា (អាយ.អរ.ស៊ី.) ប្រចាំប្រទេសកម្ពុជា ថៃ ឡាវ នៅទីស្នាក់ការកណ្តាលកាកបាទក្រហមកម្ពុជា បន្ទាប់ពីអ្នកស្រីបាន បញ្ចប់បេសកម្ម៥ឆ្នាំ។

ក្នុងឱកាសនេះ លោកស្រី ប្រធានបេសកកម្ម គណៈកម្មាធិការអន្តរជាតិ នៃកាកបាទក្រហម (អាយ.អរ.ស៊ី.) បានថ្លែងអំណរគុណ និងជម្រាបលាក្នុងបេសកកម្ម៥ឆ្នាំ (២០២០-២០២៤) ចំពោះការគាំទ្រ សម្រាប់សកម្មភាពមនុស្សធម៌ របស់    គណៈកម្មាធិការអន្តរជាតិ នៃកាកបាទក្រហម នៅប្រទេសកម្ពុជា។ លោកស្រីបានបញ្ជាក់ទៀតថា គណៈកម្មាធិការអន្តរជាតិនៃកាកបាទក្រហម និងបន្តគាំទ្របេសកកម្មមនុស្សធម៌ អាទិភាពចំនួន២ទៀត គឺការងារស្តារទំនាក់ទំនងគ្រួសារ អ្នកជាប់ឃុំឃាំងនៅពន្ធនាគា គឺផ្តល់សេវាបញ្ជូនសារពីទណ្ឌិតទៅគ្រួសារ និងពីគ្រួសារទៅទណ្ឌិតវិញ និងការងារមួយទៀតគឺ ផ្តល់សេវាស្តានិតិសម្បទា ដែលគណៈកម្មាធិការអន្តរជាតិ នៃកាកបាទក្រហមប្រចាំនៅកម្ពុជា មានសប្បកម្មផលិត «ដៃ ជើង» សិប្បនិម្មត នៅខេត្តចំនួន២ គឺខេត្តបាត់ដំបង និងខេត្តកំពង់ស្ពឺ។ លោកស្រីឱ្យដឹងទៀតថា បន្ទាប់ពីអ្នកស្រីបញ្ចប់បេសកកម្មនេះទៅ លោក ម៉ាក្ស ស្លត់ (Marc Zlot) ប្រធានកម្មវិធីស្តារលទ្ធភាពពលកម្មកាយសម្បទា និងបន្តសម្របសម្រួលការងារ២ខាងលើនៅកម្ពុជា។

ខណៈនោះដែរលោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បាននាំប្រសាសន៍សួរទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំពោះលោកស្រី ឌីណា ហ្វីស័រ និងថ្លែងអំណរគុណចំពោះ   គណៈកម្មាធិការអន្តរជាតិ នៃកាកបាទក្រហម ដែលបានគាំទ្រការងារមនុស្សធម៌នៅកម្ពុជា តាំងពីក្រោយថ្ងៃរំដោះ ៧មករា ១៩៧៩ និងបានជួយឧបត្ថម្ភដល់ កាកបាទក្រហមកម្ពុជា ទាំងថវិកា និងបច្ចេកទេសជារៀងរាល់ឆ្នាំ។ លោកជំទាវបន្តថា នៅឆ្នាំ២០២៤នេះ កាកបាទក្រហមកម្ពុជា បាននឹងកំពុងរៀចំ និងផ្សព្វផ្សាទិវាពិភពលោក កាកបាទក្រហម និង អឌ្ឍចន្ទក្រហម ៨ឧសភា ក្រោមប្រធានបទ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធននឹងអាកាសធាតុ” ដើម្បីបង្កើនការយល់ដឹងដល់ប្រជាជន រួមចំណែកក្នុងការថែក្សាសុខភាព និងប្តូរឥរិយាបទរបស់ប្រជាជន ក្នុងការរស់នៅប្រកបដោយសុខភាពល្អ ហើយបច្ចុប្បន្ននេះការឡើងកម្តៅនៅកម្ពុជា ជាបញ្ហាប្រឈមខ្លាំង ហើយកាកបាទក្រហមកម្ពុជា បានធ្វើការចុះផ្សព្វផ្សាយ អំពីវិធីសាស្ត្រការបន្សុំាខ្លួន នៅពេលអាកាសធាតុមានការប្រែប្រួលនេះ។

ទន្ទឹមនឹងនេះដែរ កាកបាទក្រហមកម្ពុជា បាននឹងកំពុងទទួលអំណោយជាថវិកា និងសម្ភារៈពីសប្បុរសជន ក្នុងឱកាសទិវា ៨ឧសភា ដើម្បី កាកបាទក្រហមកម្ពុជា មានធនធានគ្រប់គ្រាន់ ក្នុងជួយដល់ប្រជាជនរងគ្រោះ និងងាយរងគ្រោះ ដែលត្រូវការឱ្យជួយបានទាន់ពេលវេលា៕

អត្ថបទ៖ សំ ងីម