ពោធិ៍សាត់ ៖ ក្នុងរយៈពេល២៣ថ្ងៃ នៃយុទ្ធនាការបង្ក្រាបបទល្មើសធនធានធម្មជាតិនៅក្នុងខេត្តពោធិ៍សាត់ សមត្ថកិច្ច បានឃាត់ខ្លួនជនសង្ស័យ៣០នាក់ និងឃ្លុំដីបានជិតមួយម៉ឺនហិកតា។ នេះបើតាមការឱ្យដឹងពី អ្នកនាំពាក្យក្រសួងបរិស្ថាន ។

​ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បានប្រាប់BTVឱ្យដឹងថា ចាប់តាំងពីថ្ងៃផ្ដើមយុទ្ធ នាការ ថ្ងៃទី១១ ខែមីនា រហូតដល់ថ្ងៃទី២ ខែមេសា ឆ្នាំ២០២៤ នេះ កម្លាំងចម្រុះ បានបង្រ្កាបទប់ស្កាត់ បទល្មើសធនធានធម្មជាតិនៅក្នុងភូមិសាស្រ្តខេត្តពោធិ៍សាត់ សម្រេចឃ្លុំដីបានជិត១ម៉ឺនហិកតា រកឃើញ ជនសង្ស័យ ចំនួន៣០នាក់ ក្នុងនោះបានបញ្ជូនសំណុំរឿងទៅតុលាការ ចំនួន១៦ករណី និងដកហូតវត្ថុ តាងផ្សេងៗមួយចំនួនទៀត ។

ឯកឧត្តម បានឱ្យដឹងទៀតថា នៅក្នុងភូមិសាស្រ្តខេត្តពោធិ៍សាត់ បច្ចុប្បន្ន កម្លាំងចម្រុះដែលរួមមាន កងរាជអាវុធហត្ថលើផ្ទៃប្រទេស នគរបាលជាតិ កម្លាំងនៃបញ្ជាការកងឯកភាពខេត្ត រួមជាមួយអាជ្ញាធរមូល ដ្ឋានពាក់ព័ន្ធ និងមន្រ្តីឧទ្យានុរក្ស សរុបចំនួនជិត៨០០នាក់ ចែកជា១០ក្រុម បាននឹងកំពុងប្រតិបត្តិការ យ៉ាងក្តៅគគុក ដើម្បីបង្រ្កាបនិងទប់ស្កាត់បទល្មើសកាប់គាស់ រុករាន ដុតឆ្ការដីព្រៃក្នុងតំបន់ការពារធម្មជាតិ យកមកធ្វើជាកម្មសិទ្ធិ ក្នុងភូមិសាស្រ្តស្រុកភ្នំក្រវាញ និងស្រុកវាលវែង ខេត្តពោធិ៍សាត់ ។

យុទ្ធនាការបង្ក្រាបបទល្មើសធនធានធម្មជាតិនៅខេត្តពោធិ៍សាត់ ត្រូវបានធ្វើឡើងបន្ទាប់ពីសម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រី បានប្រគល់ភារកិច្ចជូនឯកឧត្តមបណ្ឌិត អ៊ាង សុផល្លែត រដ្ឋ មន្ត្រីក្រសួងបរិស្ថាន ក្រសួង ស្ថាប័ន និងកម្លាំងមានសមត្ថកិច្ចពាក់ព័ន្ធ បន្តពង្រឹងការគ្រប់គ្រងធនធានធម្ម ជាតិ និងព្រៃឈើ និងត្រូវបន្តទប់ស្កាត់ការកាប់ទន្ទ្រានបំផ្លាញព្រៃឈើនៅគ្រប់ទីកន្លែងនៅទូទាំងប្រទេស កម្ពុជា ៕

អត្ថបទ៖ ទូច សោភ័ណ