ធនាគារកណ្តាលនៅប្រទេសយេម៉ែន (CBY) កាលពីថ្ងៃអង្គារ បានផ្តល់ឱ្យធនាគារទាំងអស់ដែលកំពុងធ្វើប្រតិបត្តិការនៅក្នុងប្រទេស នូវពេលវេលាកំណត់រយៈពេល៦០ថ្ងៃ ដើម្បីផ្លាស់ប្តូរទីស្នាក់ការ របស់ពួកគេពីរដ្ឋធានីសាណា(Sanaa)ដែលគ្រប់គ្រងដោយក្រុមហ៊ូទី ទៅកាន់ទីក្រុងកំពង់ផែ Aden ភាគខាងត្បូងប្រទេស។

នៅក្នុងសេចក្តីសម្រេច ដែលបានប្រកាសនៅលើគេហទំព័ររបស់ធនាគារ ទេសាភិបាលធនាគារកណ្តាល យេម៉ែន(CBY) លោក Ahmed Ghalib បានព្រមានថា ធនាគារណាមួយដែលប្រឆាំងទៅនឹងបទបញ្ជានេះ នឹងប្រឈមមុខចំពោះវិធានការផ្លូវច្បាប់ដ៏មានសក្តានុពលក្រោមច្បាប់ស្តីពីការប្រឆាំងការលាងលុយ និងច្បាប់ហិរញ្ញប្បទានប្រឆាំងភេរវកម្មរបស់ប្រទេសយេម៉ែន។

លោក Ghalib បាននិយាយថា នេះបង្ហាញពីស្ថាប័នហិរញ្ញវត្ថុ ដែលមានទីស្នាក់ការនៅទីក្រុង Sanaa ចំពោះហានិភ័យ រួមមានការបង្កកទ្រព្យសកម្ម និងការផ្តាច់ចេញពីប្រព័ន្ធធនាគារពិភពលោក។

លោក បានបញ្ជាក់លើភាពចាំបាច់ នៃការផ្លាស់ប្តូរទីស្នាក់ការ ដើម្បីផ្តល់លទ្ធភាពឱ្យធនាគារកណ្តាលអាចអនុវត្តការត្រួតពិនិត្យបទប្បញ្ញត្តិរបស់ខ្លួនបានត្រឹមត្រូវពីទីក្រុង Aden ស្របតាមច្បាប់ធនាគារ។

កាលពីពេលថ្មីៗនេះ ក្រុមហ៊ូទី បានណែនាំប្រាក់កាក់រីយ៉ាល់១០០ថ្មី ជាការចេញរូបិយប័ណ្ណដំបូង ចាប់តាំងពីការចាប់ផ្តើមសង្គ្រាមស៊ីវិលនៅប្រទេសយេម៉ែនកាលពីជាង៩ ឆ្នាំកន្លងទៅនេះ។

សកម្មភាពនេះ ត្រូវបានរិះគន់ដោយធនាគារកណ្តាលមានមូលដ្ឋាននៅទីក្រុង Aden និងបានបញ្ជាក់ពីការបែកបាក់គោលនយោបាយរូបិយវត្ថុកាន់តែស៊ីជម្រៅរវាងក្រុមឧទ្ទាម និងរដ្ឋាភិបាលដែលត្រូវបានទទួលស្គាល់ជាអន្តរជាតិមានមូលដ្ឋាននៅទីក្រុង Aden ។

ចាប់តាំងពីឆ្នាំ ២០១៦ នៅពេលនោះ រដ្ឋាភិបាលយេម៉ែនគាំទ្រដោយប្រទេសអារ៉ាប៊ីសាអូឌីត បានផ្លាស់ប្តូរការិយាល័យធំរបស់ធនាគារកណ្តាលពីទីក្រុង Sanaa ទៅកាន់ទីក្រុង Aden ប្រទេសយេម៉ែនដែលត្រូវបានបែងចែកទៅជាតំបន់សេដ្ឋកិច្ចចំនួនពីរផ្សេងគ្នា ដោយរដ្ឋាភិបាលនៅភាគខាងត្បូង និងក្រុមឧទ្ទាមហ៊ូទី នៅភាគខាងជើង។