អ្នកនាំពាក្យការិយាល័យកិច្ចការកោះតៃវ៉ាន់របស់ក្រុមប្រឹក្សារដ្ឋចិន លោកស្រី Zhu Fenglian នៅថ្ងៃពុធ (ទី៣ ខែមេសា) នេះ បានសម្តែងការព្រួយបារម្ភយ៉ាងខ្លាំង ទាក់ទងនឹងការរញ្ជួយដីថ្មីៗនេះ ដែលបានវាយប្រហារតំបន់កោះតៃវ៉ាន់។

ជាមួយគ្នានេះ ប្រទេសចិនដីគោកបានចូលរួមរំលែកទុក្ខយ៉ាងស្មោះស្ម័គ្រ ចំពោះអ្នកដែលរងផលប៉ះពាល់ដោយគ្រោះធម្មជាតិនេះ ហើយបានសន្យាថា នឹងតាមដានស្ថានការណ៍យ៉ាងដិតដល់ ខណៈពេលដែលកំពុងរៀបចំផ្តល់ជំនួយសង្គ្រោះ។

លោកស្រី Zhu Fenglian បានសង្កត់ធ្ងន់ពីការប្តេជ្ញាចិត្តរបស់ប្រទេសចិនដីគោក ក្នុងការតាមដានយ៉ាងដិតដល់នូវការវិវត្តនៃគ្រោះមហន្តរាយនេះ ហើយប្រទេសចិនបានត្រៀមខ្លួនរួចជាស្រេច ដើម្បីពង្រីកការជួយគាំទ្រ និងជួយដល់អ្នកដែលរងផលប៉ះពាល់ដោយការរញ្ជួយដី។

គួរបញ្ជាក់ថា មនុស្ស ៧នាក់បានស្លាប់ និងជាង៧០០នាក់ រងរបួស ខណៈមនុស្សរាប់សិបនាក់ផ្សេងទៀត នៅតែជាប់ក្នុងគំនរកម្ទេចថ្ម បន្ទាប់ពីមានការរញ្ជួយដីដ៏ខ្លាំងក្លាកម្រិត ៧,៤រ៉ិចទ័រ វាយប្រហារកោះតៃវ៉ាន់ ដែលជាលើកទី១ ក្នុងរយៈពេល ២៥ឆ្នាំ៕