បន្ទាប់ពីមានការវាយប្រហាររបស់អ៊ីស្រាអែលលើស្ថានទូតរបស់ខ្លួន នៅក្នុងប្រទេសស៊ីរី ការប្រឈមនឹងពេលវេលាដ៏តានតឹងរបស់អ៊ីរ៉ង់ គឺការរកវិធីសងសឹកដែលមិនបង្កឲ្យមានជម្លោះកាន់តែរីករាលដាល ពោលជាអ្វី ដែលអ្នកវិភាគនៅតំបន់មជ្ឈិមបូព៌ាបាននិយាយថា ទីក្រុងតេអេរ៉ង់ហាក់ដូចជាមិនចង់បាននោះឡើយ។

ការវាយប្រហារកាលពីថ្ងៃចន្ទ (ទី១ ខែមេសា) ដែលបានសម្លាប់ឧត្តមសេនីយ៍អ៊ីរ៉ង់ ២នាក់ និងទីប្រឹក្សាយោធា ៥នាក់ នៅឯបរិវេណស្ថានទូតអ៊ីរ៉ង់ ក្នុងទីក្រុងដាម៉ាស បានកើតឡើងនៅពេលដែលអ៊ីស្រាអែលបង្កើនល្បឿនយុទ្ធនាការដែលមានរយៈពេលជាយូរមកហើយនោះ ប្រឆាំងនឹងអ៊ីរ៉ង់ និងក្រុមប្រដាប់អាវុធដែលប្រទេសនេះគាំទ្រ។ ក្រោយកើតហេតុការណ៍នោះ មេដឹកនាំកំពូលអ៊ីរ៉ង់ លោក Ayatollah Ali Khamenei បានប្តេជ្ញាសងសឹក។

ដើម្បីសងសឹក ទីក្រុងតេអេរ៉ង់មានជម្រើសជាច្រើន។ ប្រទេសនេះអាចបញ្ចេញសង្គ្រាមប្រូកស៊ី (សង្គ្រាមតំណាង) របស់ខ្លួនលើកងកម្លាំងអាមេរិក ប្រើវិធីនេះវាយប្រហារអ៊ីស្រាអែលដោយផ្ទាល់ ឬបង្កើនកម្មវិធីនុយក្លេអ៊ែររបស់ខ្លួន ដែលសហរដ្ឋអាមេរិក និងសម្ព័ន្ធមិត្តរបស់ខ្លួនបានប្រឹងប្រែងជាយូរមកហើយ ដើម្បីទប់ស្កាត់។

ក្នុងលក្ខខណ្ឌមិនបញ្ចេញឈ្មោះ មន្ត្រីអាមេរិកបាននិយាយថា ពួកគេកំពុងតាមដានយ៉ាងដិតដល់ ដើម្បីមើលថា តើដូចកាលពីអតីតកាលដែរ ឬទេ ដែលសង្គ្រាមប្រូកស៊ីគាំទ្រដោយអ៊ីរ៉ង់ នឹងវាយប្រហារទាហានអាមេរិកដែលមានមូលដ្ឋាននៅអ៊ីរ៉ាក់ និងស៊ីរី បន្ទាប់ពីមានការវាយប្រហាររបស់អ៊ីស្រាអែល កាលពីថ្ងៃទី១ ខែមេសានេះ។

យ៉ាងណាក្ដី មន្ត្រីអាមេរិកបានប្រាប់ថា ពួកគេមិនទាន់ទទួលបានព័ត៌មានសម្ងាត់ដែលបង្ហាញថា ក្រុមគាំទ្រដោយអ៊ីរ៉ង់កំពុងស្វែងរកការវាយប្រហារលើទាហានអាមេរិក បន្ទាប់ពីមានការវាយប្រហារដែលប្រព័ន្ធផ្សព្វផ្សាយអ៊ីរ៉ង់ បានរាយការណ៍ថា បានសម្លាប់សមាជិករបស់ IRGC (កងឆ្មាំបដិវត្តន៍អ៊ីរ៉ង់) ក្នុងនោះរួមទាំងឧត្តមសេនីយ៍ត្រីលោក Mohammad Reza Zahedi ផងដែរ។ ហើយសហរដ្ឋអាមេរិក កាលពីថ្ងៃអង្គារ (ទី២ ខែមេសា) បានព្រមានក្រុងតេអេរ៉ង់ដោយចំៗពីការវាយប្រហារលើកម្លាំងរបស់ខ្លួន។

ប្រភពមួយដែលតាមដានបញ្ហានេះដោយប្រយ័ត្នប្រយែង និងដែលនិយាយក្នុងលក្ខខណ្ឌមិនបញ្ចេញឈ្មោះ បានលើកឡើងថា អ៊ីរ៉ង់ប្រឈមនឹងបញ្ហាដែលចង់ឆ្លើយតបដើម្បីរារាំងការវាយប្រហាររបស់អ៊ីស្រាអែលបន្ថែមទៀត ខណៈដែលបញ្ចៀសការមានសង្រ្គាមគ្រប់រូបភាពទាំអស់៕