អ្នកនាំពាក្យសន្តិសុខជាតិសហរដ្ឋអាមេរិកលោក John Kirby បាននិយាយប្រាប់ក្រុមអ្នកសារព័ត៌មានថា អ៊ីរ៉ង់កំពុងជួយរុស្ស៊ីផលិតយានដ្រូនសម្រាប់ប្រើប្រាស់នៅអ៊ុយក្រែន ។

លោក Kirby បាននិយាយផងដែរថា សេតវិមាន ពុំបានដឹងថា អ៊ីរ៉ង់ផ្គត់ផ្គង់មីស៊ីលសម្រាប់ប្រើប្រាស់នៅអ៊ុយក្រែននោះទេ ។

លោក Kirby បានបញ្ជាក់ថា ពួកយើងពិតជាដឹងថា រុស្ស៊ី បាននឹងកំពុងប្រើប្រាស់យានដ្រូនរបស់អ៊ីរ៉ង់ និងមីស៊ីលបាលីស្ទិកដែលពួកគេទទួលបានពីកូរ៉េខាងជើង ។

ការរឹតត្បិតរបស់ក្រុមប្រឹក្សាសន្តិសុខអង្គការសហប្រជាជាតិលើការនាំចេញមីស៊ីល យានដ្រូន និងបច្ចេកវិទ្យាផ្សេងទៀតរបស់អ៊ីរ៉ង់ បានផុតកំណត់កាលពីខែតុលាកន្លងទៅ ។

ទោះបីជាយ៉ាងណាក៏ដោយ សហរដ្ឋអាមេរិក និងសហភាពអឺរ៉ុបនៅតែរក្សាទណ្ឌកម្មលើកម្មវិធីមីស៊ីលបាលីស្ទិករបស់អ៊ីរ៉ង់ ស្របពេលមានក្តីកង្វល់លើការនាំចេញអាវុធរបស់ពួកគេទៅកាន់តំបន់មជ្ឈិមបូព៌ា និងរុស្ស៊ី ។

ខណៈពេលនោះដែរ មន្ត្រីការទូត ៥រូបបាននិយាយថា ប្រធានអង្គការណាតូ (NATO) លោក Jens Stoltenberg បានស្នើកញ្ចប់ថវិកាចំនួន ១០០ ពាន់លានអឺរ៉ូ (ស្មើនឹង ១០៧ ពាន់លានដុល្លារ) ដែលជាកញ្ចប់ជំនួយយោធារយៈពេល ៥ ឆ្នាំដល់ប្រទេសអ៊ុយក្រែន ។ 

ក្រុមមន្រ្តីការទូតបាននិយាយថា នៅក្រោមផែនការនេះ អង្គការណាតូនឹងទទួលការងារសម្របសម្រួលមួយចំនួនពីក្រុមចម្រុះដែលដឹកនាំដោយសហរដ្ឋអាមេរិក ដែលជាជំហានមួយដែលត្រូវបានធ្វើឡើងជាផ្នែកមួយដើម្បីការពារប្រឆាំងនឹងការកាត់បន្ថយការគាំទ្រណាមួយរបស់សហរដ្ឋអាមេរិក ប្រសិនបើលោក Donald Trump ត្រឡប់មកកាន់តំណែងសេតវិមានវិញ ៕