កិច្ចខិតខំប្រឹងប្រែងជួយសង្គ្រោះ កំពុងធ្វើឡើងនៅកោះតៃវ៉ាន់ បន្ទាប់ពីរញ្ជួយដីដ៏មានឥទ្ធិពល វាយប្រហារនៅឆ្នេរសមុទ្រភាគខាងកើតកោះ នៅថ្ងៃពុធនេះ បណ្តាលឲ្យមនុស្សយ៉ាងហោចណាស់ ៧ នាក់ ស្លាប់។ រញ្ជួយដីកម្រិត ៧,៤ រ៉ិចទ័រ បានបណ្តាលឱ្យអគារជាច្រើនបាក់រលំនៅក្នុងទីក្រុង ហ័រលៀន(Hualien) ជាទីក្រុងនៅជិតចំណុចកណ្តាលបំផុតនៃការរញ្ជួយដី។ រំញ័រខ្លាំងបំផុតមិនធ្លាប់មាន ដែលបានវាយប្រហារកោះតៃវ៉ាន់ក្នុងរយៈពេល២៥ឆ្នាំមកនេះ ក៏ត្រូវបានគេដឹងកើតឡើងនៅតំបន់ភ្នំរបស់កោះតៃវ៉ាន់ ដែលត្រូវបានរញ្ជួយដោយមានបំណាក់ដីធំៗ។ នៅរដ្ឋធានីតៃប៉ិ វីដេអូ បានបង្ហាញឱ្យឃើញអគារដែលមានរំញ័រខ្លាំង។

ទីភ្នាក់ងារពន្លត់អគ្គិភ័យជាតិបាននិយាយថា មនុស្សជាង៧០០នាក់បានរងរបួស និងច្រើននាក់ជាប់នៅក្នុងអគារ និងផ្លូវរូងក្រោមដីនៅជុំវិញទីក្រុង។

នៅទីក្រុងតៃប៉ិ វីដេអូនៅលើប្រព័ន្ធផ្សព្វផ្សាយក្នុងស្រុកបង្ហាញពីអគារលំនៅឋានបាក់រលំ ហើយមនុស្សជាច្រើនត្រូវបានជម្លៀសចេញពីលំនៅឋាននិងសាលារៀនរបស់ពួកគេ។

យោងតាមវីដេអូ ដែលចាក់ផ្សាយដោយទូរទស្សន៍ក្នុងស្រុក TVBS បានឱ្យដឹងថា ផលប៉ះពាល់នៃការរញ្ជួយដីនេះបំផ្លាញរថយន្ត និងធ្វើឲ្យខ្ចាត់ខ្ចាយរបស់របរនៅខាងក្នុងហាង។ ការកាត់ផ្តាច់ថាមពលអគ្គិសនី និងការដាច់បណ្តាញអ៊ីនធឺណិត ត្រូវបានរាយការណ៍នៅទូទាំងកោះ។

ការរញ្ជួយដីនៅថ្ងៃពុធនេះ បានវាយប្រហារក្នុងជម្រៅ ១៥,៥ គីឡូម៉ែត្រ ហើយបានបណ្តាលឱ្យមានការរញ្ជួយយ៉ាងហោចណាស់ប្រាំបួនលើក ក្នុងកម្រិត៤រ៉ិចទ័រ ឬច្រើនជាងនេះ។ យោងតាមការស្ទង់ ភូមិសាស្ត្រសហរដ្ឋអាមេរិក បានឲ្យដឹងថា ចំណុចកណ្តាលនៃការរញ្ជួយដីស្ថិតនៅចម្ងាយប្រហែល ១៨គីឡូម៉ែត្រ ភាគខាងត្បូងទីក្រុង ហ័រលៀន( Hualien) ។

កាលពីខែកញ្ញាឆ្នាំ ១៩៩៩ ការរញ្ជួយដីកម្រិត ៧,៦ រិចទ័រ បានវាយប្រហារកោះតៃវ៉ាន់ បណ្តាលឲ្យមនុស្ស ២.៤០០នាក់ស្លាប់ និងបំផ្លាញអគារចំនួន ៥.០០០ខ្នង ។