​បាល់ទាត់៖ ​ក្លិប​ព័រទុយហ្កាល់ FC Porto បាន​សំរេច​ក្នុង​ការ​នាំ​យក​ខ្សែបម្រើ​សញ្ជាតិ​ស៊ែ​ប Marko Grujic ពី​ក្រុម​ហង្ស​ក្រហម Liverpool ក្នុង​តំលៃ ១០.៥​លាន​ផោន បន្ទាប់ពី​ចំណាយ​ពេល​ពេញ​មួយ​រដូវ​កាល​នៅ​ព័រទុយហ្កាល់​ក្នុង​លក្ខខណ្ឌ​ខ្ចី​ជើង​។

​​កីឡាករ​ជំរើសជាតិ​ស៊ែ​ប​វ័យ ២៥​ឆ្នាំ​រូប​នេះ​បង្ហាញខ្លួន​បាន ២៨​ប្រកួត​ឱ្យ Porto ដែល​រួមមាន ៨​ប្រកួត​នៅ UEFA Champions League ក្នុង​រយៈពេល​ពេញ​មួយ​រដូវ​កាល​ខ្ចី​ពី Liverpool​។ Marko Grujic គឺជា​កីឡាករ​ដំបូង​ដែល​មកកាន់ Liverpool ក្រោម​ការដឹកនាំ​របស់​លោក Jurgen Klopp កាលពី​ឆ្នាំ​២០១៦ ផ្ទេរ​ពី​ក្លិប​ស៊ែ​ប Red Star Belgrade ក្នុង​តំលៃ ៥.១​លាន​ផោន​។ ​តែ Grujic បង្ហាញខ្លួន​ឱ្យ Liverpool ត្រឹម ១៦ប្រកួត​ប៉ុណ្ណោះ មុន​ពេល​ចាកចេញ​ទៅកាន់ Cardiff City, Hertha Berlin និង Porto ក្នុង​លក្ខខណ្ឌ​ខ្ចី​ជើង​។​

ក្រៅពី Marko Grujic, Liverpool គ្រោង​នឹង​លក់​ចេញ​កីឡាករ ២៣ឆ្នាំ Taiwo Awoniyi ផងដែរ​។ ​​កីឡាករ​នី​ហ្សេ​រី​យ៉ា​រូបនេះ​បាន​ចំណាយពេល​ពេញ​មួយ​រដូវ​កាល ក្នុង​លក្ខខណ្ឌ​ខ្ចី​ជើង​ផង​ដែរ​នៅ​ក្លិប​អាល្លឺម៉ង់ Union Berlin រដូវ​កាល​មុន​បង្ហាញខ្លួន​បាន ២២ប្រកួត​រកបាន ៥គ្រាប់​។ Union Berlin ក៏​កំពុង​ចរចា​ផងដែរ​ក្នុង​ការទិញ​ផ្តាច់​កីឡាករ​វ័យ ២៣ឆ្នាំ​រូបនេះ​ពី Liverpool​។ ​​Taiwo Awoniyi បានមក​ដល់ Liverpool តាំងពី​ឆ្នាំ២០១៥ តែ​មិនដែល​បានបង្ហាញ​ខ្លួន​ឱ្យ Liverpool សូម្បី​មួយ​ប្រកួត ពោលគឺ​បាន​ត្រឹម​ចាកចេញ​ក្នុង​លក្ខខណ្ឌ​ខ្ចី​ទៅកាន់ Frankfurt, NEC Nijmegen, Royal Excel Mouscron, Gent, Mainz និង Union Berlin៕

​អត្ថបទ​៖​នាង សុភា​វុ​ធ