ប្រភពសន្តិសុខ បាននិយាយនៅថ្ងៃពុធនេះថា ប្រទេសកូរ៉េខាងត្បូង បានរឹបអូសនាវាគ្មានរដ្ឋមួយគ្រឿងដែលត្រូវបានចោទប្រកាន់ថា បានចូលរួមក្នុងសកម្មភាពរំលោភលើការដាក់ទណ្ឌកម្មរបស់អង្គការសហប្រជាជាតិ នៅក្នុងដែនទឹកនៃឆ្នេរសមុទ្រភាគខាងត្បូងរបស់ប្រទេសនេះ។

ពួកគេ បានបន្ថែមថា នាវាDEYI ដឹកទំនិញទម្ងន់ ៣.000 តោន ដែលត្រូវបានគេរាយការណ៍ថា កំពុងធ្វើដំណើរពីកូរ៉េខាងជើងទៅកាន់ប្រទេសរុស្ស៊ីតាមរយៈប្រទេសចិន ត្រូវបានចាប់នៅក្នុងដែនទឹកនៃទីក្រុង Yeosu កាលពីថ្ងៃសៅរ៍។

មានមនុស្ស ១៣នាក់ជិះលើនាវានោះ រួមទាំងប្រធានក្រុមចិន និងនាវិកជនជាតិចិន និងឥណ្ឌូនេស៊ីផ្សេងទៀត។

ឆ្មាំឆ្នេរសមុទ្រកូរ៉េខាងត្បូង ត្រូវបានគេនិយាយថា បានផ្លាស់ប្តូរនាវានេះ និងចូលចតក្នុងដែនទឹកចេញពីកំពង់ផែប៊ូសាន (Busan) ភាគអាគ្នេយ៍ បន្ទាប់ពីក្រុមនាវិក បានបដិសេធការបញ្ជាឲ្យបញ្ឈប់នាវានេះ។

មន្ត្រីម្នាក់នៅក្រសួងការបរទេស បាននិយាយថា៖«រដ្ឋាភិបាលរបស់យើង កំពុងធ្វើការស៊ើបអង្កេត ដោយមានការសម្របសម្រួលយ៉ាងជិតស្និទ្ធជាមួយសហរដ្ឋអាមេរិក ទៅលើការចោទប្រកាន់នាវានេះថា មានការពាក់ព័ន្ធការរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិស្តីពីកូរ៉េខាងជើង» ។