អាជ្ញាធរប៉ាឡេស្ទីន កំពុងស្នើសុំសមាជិកភាព នៅក្នុងអង្គការសហប្រជាជាតិម្តងទៀត នេះបើយោងតាមការបង្ហោះនៅលើបណ្តាញសង្គមXពីបេសកកម្មអ្នកសង្កេតការណ៍អចិន្ត្រៃយ៍ប៉ាឡេស្ទីន ទៅកាន់អង្គការសហប្រជាជាតិ កាលពីថ្ងៃអង្គារ។

សារបង្ហោះនោះ បានសរសេរថា៖«ថ្ងៃនេះ រដ្ឋប៉ាឡេស្ទីននិងតាមការណែនាំរបស់ថ្នាក់ដឹកនាំប៉ាឡេស្ទីន បានផ្ញើលិខិតមួយច្បាប់ទៅកាន់អគ្គលេខាធិកា ស្នើសុំការពិចារណាជាថ្មីចំពោះពាក្យស្នើសុំសមាជិកភាពរបស់យើង»។

សារបង្ហោះនោះ រួមមានលិខិតមួយច្បាប់ដែលចុះហត្ថលេខាដោយឯកអគ្គរដ្ឋទូតអង្គការសហប្រជាជាតិនៃដែនដីប៉ាឡេស្ទីន លោក Riyad Mansour ដែលយោងលើពាក្យសុំចូលជាសមាជិក ខែកញ្ញាឆ្នាំ ២០១១ និងបានស្នើសុំការពិចារណាជាថ្មី ក្នុងខែនេះ។

នៅក្នុងខែកញ្ញា ឆ្នាំ២០១១ អាជ្ញាធរប៉ាឡេស្ទីន បានបរាជ័យក្នុងការទទួលបានការទទួលស្គាល់ពីអង្គការសហប្រជាជាតិជារដ្ឋសមាជិកឯករាជ្យ។ មួយឆ្នាំក្រោយមក អង្គការសហប្រជាជាតិ បានសម្រេចថា ស្ថានភាព «អង្គភាពអ្នកសង្កេតការណ៍មិនមែនសមាជិក»របស់អាជ្ញាធរប៉ាឡេស្ទីន នឹងត្រូវបានផ្លាស់ប្តូរទៅជា «រដ្ឋអ្នកសង្កេតការណ៍មិនមែនសមាជិក»ស្រដៀងនឹងបុរីវ៉ាទីកង់។

អាជ្ញាធរប៉ាឡេស្ទីនដែលគ្រប់គ្រងដោយគណបក្សនយោបាយ Fatah បានគ្រប់គ្រងរដ្ឋបាលលើតំបន់ហ្កា ហ្សា រហូតដល់ឆ្នាំ ២០០៧ បន្ទាប់ពីក្រុមហាម៉ាស បានឈ្នះការបោះឆ្នោតនីតិបញ្ញត្តិឆ្នាំ ២០០៦ នៅក្នុងតំបន់កាន់កាប់ ហើយបានបណ្តេញវាចេញពីតំបន់នេះ។ ចាប់តាំងពីពេលនោះមក ក្រុមហាម៉ាស បានគ្រប់គ្រងតំបន់ហ្កាហ្សា ហើយអាជ្ញាធរប៉ាឡេស្ទីនគ្រប់គ្រងផ្នែកខ្លះនៃតំបន់វេសបែងដែលអ៊ីស្រាអែលកាន់កាប់។