បញ្ជីមហាសេដ្ឋីពិភពលោកប្រចាំឆ្នាំលើកទី៣៨ របស់ទស្សនាវដ្ដី Forbes ត្រូវបានបង្ហាញហើយ កាលថ្ងៃអង្គារ (ទី២ ខែមេសា) ដោយបុគ្គលដ៏លេចធ្លោជាងគេបំផុតក្នុងការលក់ទំនិញប្រណីតៗរបស់បារាំង គឺលោក Bernard Arnault ជាប់ចំណាត់ថ្នាក់ទី១ ចំនួន ២ឆ្នាំជាប់គ្នា។ ទស្សនាវដ្តី Forbes បានឲ្យដឹងថា ទ្រព្យសម្បត្តិសុទ្ធរបស់ថៅកែក្រុមហ៊ុន LVMH (Moët Hennessy Louis Vuitton) បានកើនឡើងប្រមាណជា ១០ភាគរយ ពោលគឺឡើងដល់ ២៣៣ពាន់លានដុល្លារអាមេរិក ដោយកំណើននេះ បានមកដោយសារចំណូលប្រចាំឆ្នាំជាកំណត់ត្រាមួយទៀត នៅក្នុងក្រុមហ៊ុននេះ។

ចំណែកលោក Elon Musk របស់ក្រុមហ៊ុន Tesla បានជាប់ចំណាត់ថ្នាក់លេខ២ ដោយមានទ្រព្យសម្បត្តិ ១៩៥ពាន់លានដុល្លារអាមេរិក ខណៈដែលលោក Jeff Bezos របស់ក្រុមហ៊ុន Amazon ជាប់ចំណាត់ថ្នាក់លេខ៣ ជាមួយនឹងទ្រព្យសម្បត្តិសុទ្ធ ១៩៤ពាន់លានដុល្លារ។ លោក Mark Zuckerberg របស់ Facebook ឈរនៅចំណាត់ថ្នាក់ទី៤ ជាមួយនឹងទ្រព្យសម្បត្តិសុទ្ធចំនួន ១៧៧ពាន់លានដុល្លារ។

នៅអាស៊ី លោក Mukesh Ambani របស់ឥណ្ឌា ដែលជាអ្នកមានជាងគេបំផុតក្នុងតំបន់ ជាប់ចំណាត់ថ្នាក់ទី៩ ដោយមានទ្រព្យសម្បត្តិសុទ្ធចំនួន ១១៦ពាន់លានដុល្លារ។ រីឯលោក Li Ka-shing របស់ទីក្រុងហុងកុង មានចំណាត់ថ្នាក់លេខទី៣៨ ជាមួយនឹងទ្រព្យសម្បត្តិសុទ្ធ ៣៧,៣ពាន់លានដុល្លារ។

បញ្ជីឆ្នាំនេះ មានមហាសេដ្ឋីចំនួន ២.៧៨១នាក់ ដែលជាចំនួនបំបែកកំណត់ត្រា។ លើសពីនេះទៀត បណ្ដាមហាសេដ្ឋីលើពិភពលោក ឥឡូវនេះ មានទ្រព្យសម្បត្តិច្រើនជាងពេលណាៗទាំងអស់ ដោយជារួមពួកគេមានតម្លៃ ១៤,២សែនកោដិដុល្លារ ពោលគឺកើនឡើង ២សែនកោដិដុល្លារ ពីឆ្នាំ២០២៣ និង ១,១កោដិសែនដុល្លារ ក្នុងឆ្នាំ២០២១។

ជាមួយគ្នានេះ មានមហាសេដ្ឋីចំណូលថ្មីជាច្រើននាក់ ក្នុងបញ្ជីនេះ ក្នុងនោះរួមទាំងតារាចម្រៀងស្រីដ៏មានប្រជាប្រិយភាពផងដែរ គឺ Taylor Swift (១,១ពាន់លានដុល្លារអាមេរិក) ដែលបានចំណូលពីការសម្ដែងតន្ត្រីទេសចរណ៍ និងអាល់ប៊ុមចម្រៀងរបស់នាង ក្នុងដំណើរផ្លូវឆ្ពោះទៅកាន់ឋានៈជាអ្នកទ្រព្យធនមហាសាលនេះ៕