ការិយាល័យអគ្គរដ្ឋអាជ្ញារបស់រុស្ស៊ី បានសរសេរទៅកាន់ប្រទេសលោកខាងលិច ដោយស្នើឲ្យពួកគេគោរពកាតព្វកិច្ចអន្តរជាតិ ក្នុងការផ្តល់យុត្តិធម៌ ខណៈដែលពួកគេ ស៊ើបអង្កេតការបំផ្ទុះបំពង់បង្ហូរប្រេង Nord Stream និង «អំពើភេរវកម្ម» នៅក្នុងប្រទេសរុស្ស៊ី។

ទីក្រុងមូស្គូ បានបង្ហាញពីការខកចិត្តរបស់ខ្លួនចំពោះលក្ខណៈដែលមិនអាចសន្និដ្ឋានលើការស៊ើបអង្កេតដោយមហាអំណាចបរទេសមួយចំនួន ក្នុងការផ្ទុះនៅក្នុងខែកញ្ញាឆ្នាំ ២០២២ លើបំពង់បង្ហូរប្រេងដែលត្រូវបានបង្កើតឡើង ដើម្បីបង្ហូរឧស្ម័នរុស្ស៊ី ទៅកាន់អឺរ៉ុបខាងលិច។

ប្រទេសដាណឺម៉ាក បានទម្លាក់ការស៊ើបអង្កេតរបស់ខ្លួន នៅក្នុងខែកុម្ភៈ បន្ទាប់ពីស៊ុយអែត បានបិទការស៊ើបអង្កេតរបស់ខ្លួន ហើយបានប្រគល់ភ័ស្តុតាងដែលខ្លួនបានរកឃើញ ទៅឲ្យអ្នកស៊ើបអង្កេតអាល្លឺម៉ង់។

អគ្គរដ្ឋអាជ្ញារុស្ស៊ី បាននិយាយថា លិខិតទាំងនោះ ត្រូវបានផ្ញើទៅកាន់ប្រទេសកោះស៊ីប បារាំង អាល្លឺម៉ង់ និងសហរដ្ឋអាមេរិក បន្ទាប់ពីសមាជិកសភា និងឥស្សរជនរុស្ស៊ី បានស្នើសុំព័ត៌មានអំពីការស៊ើបអង្កេតនេះ។

ប្រទេសរុស្ស៊ី បាននិយាយថា ខ្លួនចង់ដឹងអំពីការចូលរួមដែលអាចកើតមានរបស់បុគ្គល និងអង្គការ ក្នុងការបង្កើត និងផ្តល់មូលនិធិដល់សកម្មភាពភេរវកម្មមួយចំនួន នៅក្នុងប្រទេសរុស្ស៊ី ក៏ដូចជាការបំផ្ទុះបំពង់     បង្ហូរប្រេង Nord Stream ផងដែរ។

ប្រទេសនេះ មិនបាននិយាយឲ្យច្បាស់ពីការវាយប្រហារកាលពីខែមុន លើសាលប្រគុំតន្ត្រី នៅទីក្រុងមូស្គូដែលមនុស្សជាង ១៤០ នាក់ត្រូវបានសម្លាប់។ វិមានក្រឹមឡាំង បានភ្ជាប់វាទៅនឹងអ៊ុយក្រែន ខណៈពេលដែលនិយាយថា ការវាយប្រហារនេះ ត្រូវបានធ្វើឡើងដោយក្រុមឥស្លាមនិយម។ អ៊ុយក្រែនបដិសេធរាល់ តួនាទីណាមួយ ក្នុងការវាយប្រហារនេះ។