ភ្នំពេញ ៖ មហាជនផ្ញើសារអបអរសាទរសម្ដេចតេជោ ហ៊ុន សែន ដែលបានជាប់ឆ្នោតជាប្រធានព្រឹទ្ធសភា បន្ទាប់ពីសម័យប្រជុំក្រោមអធីបតីភាពដ៏ខ្ពង់ខ្ពស់បំផុត ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានបោះឆ្នោតជ្រើសរើសសម្ដេចជាប្រធានព្រឹទ្ធសភា ដោយសំលេង ៦២ លើ ៦២។

​ជាក់ស្ដែងតាមរយៈបណ្ដាញសង្គមហ្វេសប៊ុក និងឆានែលតេឡេក្រាម ថ្មាក់ដឹកនាំតាមណ្ដាក្រសួង ស្ថាប័ន មន្រ្ដីរាជការ មន្រ្ដីអង្គការ សមាគមន៍ សង្គមស៊ីវិល និងប្រជាពលរដ្ឋទូទៅ បានផ្ញើសារលិខិត អបអរសាទរចំពោះសម្ដេចតេជោ ហ៊ុន សែន ដែលត្រូវបានជាប់ឆ្នោតជាប្រធានព្រឹទ្ធសភា ក្នុងសម័យប្រជុំលើកដំបូងនៃនីតិកាលទី៥នេះ។ 

តាមរយៈសារលិខិតរបស់មហាជនផ្ញើជូនសម្ដេចតេជោ ហ៊ុន សែន ដោយភ្ជាប់ជាមួយរូបភាពសម្ដេចផងនោះបានបង្ហាញក្ដីសាទរសប្បាយរីករាយ និងមានមោទកភាពយ៉ាងក្រៃលែងដែលបានឃើញសម្ដេចតេជោដែលជាវីរជនកំពូលរបស់កម្ពុជា បានបន្តកាន់តំណែងកំពូលនៅក្នុងស្ថាប័នព្រឹទ្ធសភានាថ្ងៃនេះ។ 

ក្នុងនោះថ្នាក់ដឹកនាំបណ្តាក្រសួង ស្ថាប័ននានា ទាំងស្ថាប័ននីតិបញ្ញាត្តិ និងប្រតិបត្តិបានផ្ញើសារអបអរសាទរ និងជូនពរ ចំពោះសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា នាឱកាសដែលសម្តេចត្រូវបានសមាជិកព្រឹទ្ធសភាទាំងមូលបោះឆ្នោតជ្រើសតាំងជាប្រធានព្រឹទ្ធសភាសម្រាប់នីតិកាលទី៥នេះ ខណៈតួនាទីដ៏ឧត្តុង្គឧត្តមនេះពិតជាស័ក្តិសមបំផុតចំពោះគំរូវីរភាពរបស់សម្តេចតេជោ ដែលជាបិតាស្ថាបនិកសន្តិភាពរបស់កម្ពុជានោះ។

ក្រៅពីនេះបណ្ដាអង្គការសមាគមន៍ សហភាពសិទ្ធិកម្មករកម្ពុជា តំណាងឱ្យកម្មករ កម្មការិនី ដែលជាសមាជិកជាងរាប់ម៉ឺននាក់ រួមនឹងប្រជាពលរដ្ឋនៅសេដ្ឋកិច្ចក្រៅប្រព័ន្ធបានផ្ញើសារលិខិត អបអរសាទរ ជូនចំពោះសម្តេចតេជោ ហ៊ុន សែន បានសម្តែងនូវការគោរពដឹងគុណយ៉ាងជ្រាលជ្រៅបំផុត ចំពោះសម្តេច ដែលបានយកអស់កម្លាំងកាយចិត្ត ប្រាជ្ញាស្មារតី តស៊ូរំដោះប្រទេសជាតិ និងប្រជាជនពីរបបប្រល័យពូជសាសន៍ និងបន្តចូលរួមចំណែកក្នុងការស្តារ និងកសាងប្រទេស ការពារខឿនឯករាជ្យជាតិ បូរណភាពទឹកដី នាំមកនូវសុខសន្តិភាព សុខដុមរមនីយភាព ជូនប្រជាជនកម្ពុជាទូទាំងប្រទេស។

ក្នុងនោះមហាជនជាពិសេសថ្នាក់ដឹកនាំវ័យក្មេងជំនាន់ក្រោយ បានសម្តែងនូវក្តីកត្តញ្ញូកតវេទីដ៏ជ្រាលជ្រៅបំផុត ចំពោះការលះបង់កម្លាំងកាយ ចិត្ត ធ្វើពលិកម្មសព្វបែបយ៉ាងដើម្បីជាតិមាតុភូមិ និងប្រជាជនរបស់សម្តេច។  បន្ទាប់ពីបេសសកម្មដឹកនាំជាតិរយៈពេលជាង៤០ឆ្នាំ ក្នុងឋានៈជានាយករដ្ឋមន្ត្រី សម្តេចនឹងបន្តដឹកនាំស្ថាប័ននីតិបញ្ញត្តិជាន់ខ្ពស់ ដើម្បីចូលរួមចំណែកក្នុងការកាន់ចង្កូរនាវាកម្ពុជាឱ្យស្ថិតស្ថេរគង់វង្សលើមាគ៌ាសន្តិភាព និងការអភិវឌ្ឍ។ 

មហាជនបានគត់សម្គាល់ឃើញថា ការបោះឆ្នោតផ្តល់សេចក្តីទុកចិត្តជូនសម្តេចតេជោ ដើម្បីដឹកនាំស្ថាប័នកំពូលមួយនេះ គឺពិតជាបង្ហាញយ៉ាងជាក់ច្បាស់នូវតួនាទីដ៏ឧត្តុង្គឧត្តមរបស់សមេ្តចតេជោដែលប្រជារាស្ត្រខ្មែរច្រើនលើសលប់គោរព ស្រឡាញ់ដ៏ជ្រាលជ្រៅ និងតែងតែមានជំនឿចិត្តយ៉ាងមុតមាំលើគតិបណ្ឌិត និងភាពវៃឆ្លាតរបស់សម្តេចតេជោ ក្នុងការដឹកនាំប្រទេសជាតិ៕

អត្ថបទ៖ វ៉ន ដារ៉ា