​អាមេរិក៖ មហាសេដ្ឋី​ជំនួញ​អាមេរិក ​លោក Jeff Bezos បាន​ធ្វើ​ដំណើរ​ក្នុង​រយៈពេល​ដ៏​ខ្លី​ទៅ​ដល់​ទី​អវកាស ជា​ការ​ហោះហើរ​ផ្ទុក​អវកាស​យានិក​ដំបូង​នៃ​នាវា​ចម្លង​ផ្ទាល់ខ្លួន​របស់​លោក​ឈ្មោះ New Shepard​។

លោក​ត្រូវ​បាន​អម​ដំណើរ​ដោយ​លោក Mark Bezos ដែល​ជា​បងប្រុស​របស់​លោក​ លោក Wally Funk វ័យ ៨២​ឆ្នាំ​ជា​អ្នកត្រួសត្រាយ​ផ្លូវ​នៃ​ការ​ប្រណាំង​ប្រជែង​ផ្នែក​ទី​អវកាស និង​និស្សិត​អាយុ ១៨​ឆ្នាំ​ម្នាក់​ទៀត​។​ ​ពួកគេ​បាន​ធ្វើ​ដំណើរ​នៅ​ក្នុង​យាន​មួយ ឬ​ហៅថា កាប់​ស៊ុ​ល ​(capsule) ​មាន​បង្អួច​ធំ​បំផុត​ដែល​ហោះ​ហើរ​ក្នុង​លំហ ​ដែល​អាច​មើល​ឃើញ​ទេសភាព​ដ៏​ស្រស់​ស្អាត​នៃ​ភព​ផែនដី​។​ នៅ​ពេល​កាប់​ស៊ុ​ល​បាន​វិល​ត្រឡប់មកវិញ បន្ទាប់ពី​ការហោះហើរ​រយៈពេល ១០​នាទី និង ១០​វិនាទី លោក Jeff Bezos បាន​លាន់មាត់​ថា​ នេះ​ជា​ថ្ងៃ​ល្អ​បំផុត​មិន​ធ្លាប់​មាន​។​ យាន​ចម្លង New Shepard ដែល​ត្រូវ​បាន​ផលិត​ឡើង​ដោយ​ក្រុមហ៊ុន Blue Origin របស់​មហាសេដ្ឋី​ជំនួញ Bezos ត្រូវ​បាន​ចេញ​គំរូ​ដើម្បី​បម្រើ​ដល់​ទីផ្សារ​ដែល​កំពុង​រីក​ដុះដាល​ ស​ម្រា​ប់​វិស័យ​ទេសចរណ៍​លំហ​អាកាស​។​

​ស្ថាបនិក​ក្រុមហ៊ុន​ពាណិជ្ជកម្ម​តាម​អ៊ីនធឺណិត Amazon លោក Bezos និង​អ្នកចូលរួម​ដទៃ​ទៀត​នៅ​ក្នុង ​“ការ​ប្រណាំង​ប្រជែង​ទី​អវកាស​មហាសេដ្ឋី​” ត្រូវ​បាន​គេ​រិះគន់​ចំពោះ​ការ​ផ្តល់​ជូន​នូវ​អ្វី​ដែល​អ្នកខ្លះ​គិត​ថា ​ជា​ការ​ជិះ​កម្សាន្ត​សម្រាប់​តែ​អ្នកមាន​ទ្រព្យសម្បត្តិ​ចាយ​មិន​អស់​។ ក្រុម​អ្នក​រិះគន់​និយាយ​ថា ​ប្រាក់​ដែល​ចំណាយ​លើ​យាន​នេះ​ គួរតែ​យក​ទៅ​ចំណាយ​លើ​ការដំឡើង​ប្រាក់ខែ​ឲ្យ​បុគ្គលិក ឬ​ប្រយុទ្ធ​ប្រឆាំង​នឹង​ការប្រែប្រួល​អាកាសធាតុ​វិញ​ល្អ​ជាង​៕

អត្ថបទ៖ សុខមាន