កំពង់ឆ្នាំង៖ ដោយសារការបំរែបំរួលអាកាសធាតុ និងការពង្រីកដីស្រែប្រាំងច្រើនលើសលុបនៅជុំវិញបឹង ធ្វើអោយបឹងរនាបសែន ស្ថិតក្នុងភូមិគោកស្តៅ ឃុំទឹកហូត ស្រុករលាប្អៀរ ខេត្តកំពង់ឆ្នាំង បានរីងរាក់រហូតមើលឃើញខ្នងត្រីពូជដែលប្រជាសហគមន៍បានថែរក្សាជាយូរមកហើយ។ នៅព្រលប់ថ្ងៃទី០៣ ខែមេសា ឆ្នាំ២០២៤នេះ ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង និងលោក សាន់ យូ អភិបាលរងខេត្តតំណាងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងនាយខ័ណ្ឌរដ្ឋបាលជលផលកំពង់ឆ្នាំង បានចុះពិនិត្យនិងជួយភ្លាមៗ ដើម្បីសង្គ្រោះពូជត្រីក្នុងបឹងជាបន្ទាន់។

 ប្រជាសហគមន៍បានអោយដឹងថា៖ កាលពីឆ្នាំមុនៗ ទឹកក្នុងបឹងអភិរក្សនេះមិនដែលរីងរាក់ដូចនេះទេ ទើបតែឆ្នាំនេះដោយសារការបំរែបំរួលអាកាសធាតុ(ក្តៅខ្លាំង) និងការពង្រីកដីស្រែប្រាំងច្រើនលើសលុបនៅជុំវិញបឹង បានធ្វើអោយទឹកក្នុងបឹងអភិរក្សរនាបសែននេះ បានរីងរាក់យ៉ាងឆាប់រហ័ស បើទោះជាប្រជាសហគមន៍នេសាទរនាបសែន បានប្រឹងប្រែងទប់ស្កាត់ និងការពារយ៉ាងណាក្តី ។ ប្រជាសហគមន៍ទាំងអស់ ត្រូវការជំនួយសង្គ្រោះជាបន្ទាន់ ដើម្បីថែរក្សាពូជត្រីទាំងអស់ក្នុងបឹងនេះ អោយរស់រានឡើងវិញ។

 លោក លី ឡា នាយខ័ណ្ឌរដ្ឋបាលជលផលកំពង់ឆ្នាំង បានថ្លែងថា៖ បឹងអភិរក្សរនាបសែននេះ មិនដែលរីងរាក់បែបនេះទេ តែឆ្នាំនេះបែជាត្រូវរីងហួតយ៉ាងឆាប់រហ័ស សូម្បីតែភ្លៀងកក់ខែតែមួយមេក៏គ្មាន ។ ករណីនេះធ្វើអោយរូបលោក រួមនិងប្រជាសហគមន៍បឹងរនាបសែន មានការព្រួយបារម្ភយ៉ាងខ្លាំង និងត្រូវការសង្គ្រោះពូជត្រីច្រើនប្រភេទជាបន្ទាន់។ ក្រោយពីដឹងពីករណីបឹងរនាបសែនប្រឈមនឹងការរីងរាក់នេះ ឯកឧត្តម ស៊ុន សុវណ្ណារិទ្ធិ អភិបាលខេត្ត រួមនិងឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង បានដាក់គ្រឿងចក្រចុះជីករណ្តៅជ្រៅនៅបាតបឹង និងបូមទឹកជួយសង្គ្រោះពូជត្រីជាបន្ទាន់ ធ្វើយ៉ាងណាកុំអោយទឹកក្នុងបឹងនេះរីង។

 ក្នុងពេលចុះពិនិត្យ និងជួយសង្គ្រោះនោះ ឯកឧត្តម ឯក ស៊ុនរស្មី បានអំពាវនាវអោយបងប្អូនប្រជាសហគមន៍ និងប្រជាកសិករនៅជុំវិញបឹងទាំងអស់ ត្រូវចេះស្រឡាញ់ និងជួយថែរក្សាការពារពូជត្រីក្នុងបឹងអភិរក្សនេះ កុំចាប់មេពូជត្រី កុំបូមទឹកប្រើខ្ជះខ្ជាយ ទុកមេពូជត្រីទាំងអស់បង្កើតកូនបានច្រើន ដើម្បីបងប្អូនបាននេសាទនៅរដូវវស្សា ជួយទ្រទ្រង់ជីវភាពបងប្អូនបានមួយកម្រឹត៕ ដោយ ÷ កាំង ហុងវាស្នា