ឯកឧត្តមវេជ្ជបណ្ឌិត អ៊ឹង ភីរុន រដ្ឋលេខាធិការ តំណាងឯកឧត្តមសាស្ត្រាចារ្យ ឈាង រ៉ា រដ្ឋមន្ត្រី​ក្រសួង​សុខាភិបាល បានស្នើគ្រប់ភាគីពាក់ព័ន្ធទាំងអស់ រួមគ្នាសំដៅបញ្ចប់ជំងឺរបេង២០២៤-២០២៥​ខាងមុខនេះ។ ការថ្លែងរបស់​ឯកឧត្តម វេជ្ជបណ្ឌិត អ៊ឹង ភីរុន យ៉ាងដូច្នេះ​ក្នុងពិធី​បើក​សន្និបាត​​ការងារ​កម្ចាត់​រោគ​របេងទូទាំងប្រទេសលើកទី ២៧ រយៈពេល២ថ្ងៃ ចាប់ពីថ្ងៃទី៤-៥ ខែមេសា ឆ្នាំ ២០២៤។

ឯកឧត្តម វេជ្ជបណ្ឌិត បានលើកឡើងទៀតថា សម្រាប់ការងារ​កម្ចាត់រោគរបេងក្នុងអំឡុងឆ្នាំ ២០២៤-២០២៥ខាងមុខនេះ យើងនឹងមានកិច្ចការជាច្រើនដើម្បីបំពេញ ស្របតាម​យុទ្ធសាស្ត្រ​បញ្ចប់​ជំងឺ​របេង និងគោលដៅអភិវឌ្ឍន៍ប្រកបដោយចិរភាព។ ជាពិសេស​ដើម្បី​សម្រេច​បាន​ទិស​ដៅ​ឆ្នាំ​ថ្មី២០២៤ ក៏ដូចជាឆ្នាំបន្ត យើងត្រូវខិតខំធ្វើយ៉ាងណា ស្រាវជ្រាវ​រក​ករណី​ជំងឺ​របេង​គ្រប់​សណ្ឋាន​ឲ្យ​បានច្រើនថែមទៀត ស្របតាមទិសដៅថ្មីរបស់កម្មវិធីជាតិ និងអន្តរជាតិ ពោល​គឺ​ការ​ទទួល​បាន​សេវាជំងឺរបេងជាសកល។ ត្រូវយកចិត្តទុកដាក់ពង្រឹងការអនុវត្តន៍គោលនយោបាយ ក្នុង​ការធ្វើរោគវិនិច្ឆ័យ និងព្យាបាល ជំងឺរបេង ដោយពុំត្រូវបានបង់ថ្លៃឡើយ ដើម្បីជា​ការ​ជំរុញ​លើក​ទឹក​ចិត្តអ្នកជំងឺ ឲ្យឆាប់មកទទួល សេវារបេង ប្រកបដោយគុណភាព។ ត្រូវខិតខំ​ពង្រឹង​ថែម​ទៀត ការព្យាបាលបង្ការជំងឺរបេង ការងាររបេងកុមារ និងពិសេស ការអង្កេត ស្រាវ​ជ្រាវ​រក​ជំងឺ​របេង​ ក្នុងចំណោមអ្នករស់នៅជិតស្និទ្ធិជាមួយនឹងអ្នកជំងឺរបេង និងក្រុមមានហានិភ័យខ្ពស់ ដូច​ជា​ក្នុង​ចំណោមអ្នកផ្ទុកមេរោគអេដស៏ អ្នកកើតទឹកនោមផ្អែម ក្រុមមនុស្ស មានវ័យចំណាស់ និងនៅ​ពន្ធនាគារ​ជាដើម ។ បន្តពង្រឹងការសហការការងារររបេងស៊ាំថ្នាំ និងរបេង-អេដស៍ ដើម្បីកាត់​បន្ថយប​ន្ថែមទៀត អត្រា ឈឺ និងស្លាប់ដោយសារបញ្ហានេះ។ ត្រូវស្វែងរកធនធានបន្ថែម ដោយ​សហការ​យ៉ាងជិតស្និទ្ធិជាមួយនឹងភាគីពាក់ព័ន្ធ។

ឯកឧត្តមវេជ្ជបណ្ឌិត អ៊ឹង ភីរុន បានបញ្ជាក់ថា សមិទ្ធិផលដែលទទួលបានគួរជាទីមោទនៈ នេះគឺ​អាស្រ័យ​ដោយ​មានការគាំទ្រ លើកទឹកចិត្តពី សំណាក់រាជរដ្ឋាភិបាល ក្រោមការដឹកនាំដ៏ឈ្លាសវៃ ប្រកប​ដោយ​គតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ការចូលរួមយ៉ាងសកម្មរបស់អាជ្ញាធរដែនដី មន្ត្រីបម្រើការងាររបេង​គ្រប់​ថ្នាក់​ ការជួយឧបត្ថម្ភជាបច្ចេកទេស ថវិកា និង សម្ភារ ក្នុងសកម្មភាព ការងារប្រយុទ្ធនឹងជំងឺរបេង ពី​សំណាក់អង្គការដៃគូជាតិ អន្តរជាតិ និងកិច្ចសហប្រតិបត្តិការ និងសម្របសម្រួល ដ៏ល្អ​ប្រសើរ​របស់​មន្ត្រី​សុខាភិបាលបម្រើការនៅមន្ទីរពេទ្យបង្អែក មណ្ឌលសុខភាព ប៉ុស្តិ៍សុខភាព ជាមួយ​សហគមន៍​មូលដ្ឋាន ស្ថាប័នសុខាភិបាលពាក់ព័ន្ធ និងស្ថាប័នមិនមែនសុខាភិបាលផងដែរ ព្រម​ទាំង​មាន​ការស្ម័គ្រ ចិត្តចូលរួមថែទាំ និងព្យាបាលអ្នកជំងឺរបេងពីអ្នកស្ម័គ្រចិត្តតាមភូមិ រួមទាំង​ញាតិ​មិត្ត​សាច់​សាលោហិតរបស់ អ្នកជំងឺ រួមទាំងអតីតអ្នកជំងឺរបេងទៀតផង។

បើតាមលោកវេជ្ជបណ្ឌិត ហួត ចាន់យុដា ប្រធានមជ្ឈមណ្ឌលជាតិកំចាត់រោគរបេង និងហង់សិន បាន​ឲ្យដឹងថា នៅឆ្នាំ២០២២ នៅទូទាំងសកលលោក មានអ្នកជំងឺ​របេង​ថ្មីកើតមាន​ប្រមាណ​ចំនួន​ ១០លាន ៦ សែននាក់ ក្នុងនោះមានតែ ៧លាន៥សែន ករណីប៉ុណ្ណោះ ដែលបាន​ស្រាវ​ជ្រាវ​រក​ឃើញ និងរាយការណ៍ទៅអង្គការសុខភាពពិភពលោក ដូចនេះ នៅសល់ជំងឺប្រមាណ ៣លាន១នាក់ទៀត ពុំបានទទួល សេវា ស្រាវជ្រាវ និងព្យាបាលនៅ ឡើយ។ លើសពីនេះទៀត ជំងឺរបេងនៅតែឆក់យកអាយុជីវិតមនុស្សក្នុង មួយឆ្នាំៗ ប្រមាណ១លាន ៣ សែននាក់ (១ ៣០០ ០០០នាក់)។ ចំណែកនៅកម្ពុជា ក្នុងឆ្នាំ២០២៣ កន្លងមកនេះ ដោយ​មាន​ជំនួយ​ឧបត្ថម្ភ​គាំទ្រ​យ៉ាង​ខ្លាំង​ក្លាពីរាជរដ្ឋាភិបាល អង្គការជាដៃគូ ព្រមទាំងកិច្ចសហប្រតិបត្តិការ និងសំរបសំរួលល្អ របស់​មន្ត្រីសុខាភិបាលបំរើការងារនៅមន្ទីរ ពេទ្យបង្អែក មណ្ឌលសុខភាព ប៉ុស្តិ៍សុខភាព ជាមួយ​សហគមន៍មូលដ្ឋាន ស្ថាប័នសុខាភិបាលពាក់ព័ន្ធ និង ស្ថាប័នមិនមែនសុខាភិបាល បាន​ធ្វើ​ឱ្យ​កម្ម​វិធី​ជាតិកម្ចាត់ រោគរបេង បានទទួលសមិទ្ធិផលថ្មីៗថែមទៀត ពិសេសគឺការរក្សាបាន អត្រា​ព្យាបាល​ជោគជ័យបាន ៩៦% ដែលលើសពីគោលដៅចំណុចប្រចាំឆ្នាំ ដែល កំណត់ត្រឹមតែ ៩០%។ ស្រាវជ្រាវជំងឺរបេងសរុបបាន ៣២ ២៨៦ ករណី ។ សកម្មភាពសហការការងារ របេង​អេដស៍ មាននៅគ្រប់ស្រុកប្រតិបត្តិទាំងអស់នៅឆ្នាំ ២០២៣ ដែលក្នុងឆ្នាំ២០០៨ មានតែ ៥៧ ស្រុក ប្រតិបត្តិប៉ុណ្ណោះ ហើយសេវារបេងកុមារក៏មាននៅគ្រប់ស្រុកប្រតិបត្តិផងដែរ។ កម្មវិធី​ជាតិ​កម្ចាត់​រោគរបេង មានមណ្ឌលព្យាបាលជំងឺរបេងស៊ាំថ្នាំច្រើនមុខចំនួន ១១ កន្លែង​នៅ​ឆ្នាំ​២០២៣​។ យើងមានសេវា PPM- DOTS ក្នុង១៤ ខេត្ត និង ៣៤ ស្រុកប្រតិបត្តិ ក្នុងឆ្នាំ២០២៣៕ អត្ថបទ រដ្ឋា