ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និង​សំណង់ លើកឡើងថា កិច្ចប្រជុំកំពូលធុរកិច្ចអាស៊ាន-កម្ពុជាឆ្នាំ២០២៤នេះ គឺជាព្រឹត្តិការណ៍​ដ៏​សំខាន់ ដើម្បីបង្កើនមិត្តភាព ភាពជាដៃគូ កិច្ចសហប្រតិបត្តិការរវាងភាគីពាក់ព័ន្ធ រួមទាំង​សហគ្រិន និងវិនិយោគិនទាំងអស់គ្នានៅក្នុងតំបន់អាស៊ាន។

ឯកឧត្តម សាយ សំអាល់ បានថ្លែងនៅក្នុងពិធីបិទ វេទិកាធុរកិច្ចអាស៊ាន-កម្ពុជា ឆ្នាំ២០២៤ នៅ​ថ្ងៃ​ទី២ ខែមេសា នេះថា វេទិកាដ៏សំខាន់មួយនេះបានផ្តល់ឲ្យអ្នកចូលរួមទាំងអស់ ពិភាក្សា លើ​ប្រធាន​បទ​សំខាន់ៗ ទាក់ទងទៅនឹងការតភ្ជាប់បណ្តាញថាមពលអាស៊ាន និងថាមពល​កកើត​ឡើង​វិញ និងនិរន្តរភាពអាស៊ាន, បច្ចេកវិទ្យា និងកំណើនប្រកបដោយបរិយាប័ន្ន ដែល​បាន​បង្ហាញ​អំពី​សក្ដានុពលដ៏ធំនៅក្នុងតំបន់អាស៊ាន សម្រាប់ការកសាងភាពធន់ របស់សហគមន៍តែមួយ។

ឯកឧត្តម​ឧបនាយករដ្ឋមន្ត្រី បានបន្តថា វេទិកានេះគឺជាជំហានដ៏សំខាន់ ដើម្បីព​ង្រឹង​បន្ថែម​ទៀត​នូវ​ចំណង​រវាងរដ្ឋជាអាស៊ាន និង ពង្រីកកិច្ចសហប្រតិបត្តិការ និងការធានានូវអត្ថប្រយោជន៍រួម ទាំង​មានពេលបច្ចុប្បន្ន និងអនាគត លើទីផ្សារការងារប្រជាជនជាង ៦៧ លាននាក់ ដើម្បីលើក​កម្ពស់​បរិយាកាស​​ នៃការវិនិយោគនៅក្នុងតំបន់អាស៊ាន តាមរយៈការភ្ជាប់បណ្តាញឧស្សាហកម្ម និង​កិច្ចព្រមព្រៀងអាស៊ាន ក្នុងការធ្វើសមារណកម្មសេដ្ឋកិច្ច ។

សូមបញ្ជាក់ថា វេទិកាធុរកិច្ចអាស៊ាន-កម្ពុជា ឆ្នាំ២០២៤ នេះ បានផ្តោតទៅ​លើកិច្ច​ពិភាក្សា​លើ​ប្រធាន​បទ៖ ការតភ្ជាប់បណ្តាញ ថាមពលអាស៊ាន និងថាមពលកកើតឡើងវិញ និងនិរន្តរភាព​អាស៊ាន​, កិច្ចពិភាក្សាស្វែងយល់ពីសក្តានុពលរបស់កម្ពុជា សម្រាប់ច្រក យុទ្ធសាស្ត្រ​ទៅ​កាន់​ទីផ្សារ​អាស៊ាន, ដោយផ្តោតលើឱកាសវិនិយោគ បរិយាកាសធុរកិច្ច និងគំនិតផ្តួច​ផ្តើម​របស់​រដ្ឋាភិបាល ដើម្បីគាំទ្រ ការវិនិយោគបរទេស, ឱកាស​ប្រាស្រ័យ​ទាក់ទង​ជាមួយ​អ្នក​ដឹកនាំ​ធុរកិច្ច​កម្ពុជា និងមន្ត្រីរដ្ឋាភិបាល, ផ្តោតលើការដាក់បញ្ចូលឌីជីថល ពាណិជ្ជកម្មអេឡិចត្រូនិក និង​ដំណោះ​ស្រាយបច្ចេកវិទ្យាហិរញ្ញវត្ថុ និងបញ្ញាសិប្បនិមិ្មត AI ផងដែរ៕ អត្ថបទ៖ សុន រ៉ាឌី