ភ្នំពេញ៖ នៅថ្ងៃទី២១ ខែកក្កដា ឆ្នាំ២០២១ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការ​អន្តរ​ជា​តិ នៃព្រះរាជាណាចក្រកម្ពុជា បានអញ្ជើញចូលរួមដឹកនាំកិច្ចប្រជុំរដ្ឋមន្រ្តីការបរ ទេសមេគង្គ-គង្គាលើកទី១១ ជាមួយឯកឧត្តមបណ្ឌិត ស៊ូ​ប្រាម៉ានយ៉ាំ ចៃហ្សានកា រដ្ឋមន្ត្រីការបរ​ទេស នៃសាធារណរដ្ឋឥណ្ឌា តាមប្រព័ន្ធវីដេអូ និងមានការអញ្ជើញចូលរួមរបស់​រដ្ឋមន្រ្តីការ​បរទេស​នៃបណ្តា​ប្រទេសជាសមាជិកមេគង្គ ដទៃទៀត។

បើតាមសេចក្ដីប្រកាសព័ត៌មាន​របស់ក្រសួងការបរ​ទេស និង​សហប្រតិបត្តិការ​អន្តរ​ជាតិ ចេញនៅយប់ថ្ងៃទី២១ ខែកក្កដា។ ប្រភព​ដដែ​ល​​បន្តថា នាឱកាសគម្រប់ខួបអនុស្សាវរីយ៍ ២០ឆ្នាំ នៃកិច្ចសហប្រតិបត្តិការមេគង្គ-គង្គា(២០ ០០​​-​២០២០) រដ្ឋមន្រ្តីទាំងអស់ បាន​ថ្លែង​កោត​សរសើរចំពោះវឌ្ឍនភាពនៃការអនុវត្តផែនការសកម្មភាពរយៈ​ពេល៤ឆ្នាំ នៃកិច្ចសហប្រតិបត្តិការមេគង្គ-គង្គា ២០១៩-២០២២។

កិច្ចប្រជុំ ក៏បើកសម្ពោធឱ្យដំណើរការនូវគេហទំព័រ MGC និងការចាក់បង្ហាញឯកសារវីដេអូ ដែលឆ្លុះបញ្ចាំងអំពីសមិទ្ធផល​នៃកិច្ច​សហ​ប្រតិបត្តិ​ការ ក៏ដូចជាធនធានធម្មជាតិ សង្គម និងវប្បធម៌ដ៏សម្បូរបែបរបស់ប្រទេសសមាជិក។

គួរបញ្ជាក់ផងដែរថា ជំងឺរាតត្បាតកូវីដ-១៩ បានពន្យារពេលដល់ការប្រារព្ធខួបអនុស្សាវរីយ៍២០ឆ្នាំ នៃកិច្ចសហប្រតិបត្តិការមេគង្គ-គង្គា ដែល​បានគ្រោងរៀបចំនៅខែមេសា ឆ្នាំ២០២០ នៅសារមន្ទីរវាយន​ភណ្ឌ​​ប្រពៃណីអាស៊ី ខេត្តសៀមរាប ប្រទេសកម្ពុជា។

រដ្ឋ​មន្រ្តីទាំងអស់បានសម្តែងក្តីសង្ឃឹមថា នឹងអាចរៀបចំព្រឹត្តិការណ៍អបអរសាទរក្នុងពេលឆាប់ៗខាងមុខ នៅពេលដែលស្ថាន​ភាព​ជំងឺ​រាត​​ត្បាតកូវីដ-១៩ មានភាពប្រសើរឡើង។

រដ្ឋមន្រ្តីទាំងអស់បានកោតសរសើរចំពោះការគាំទ្រគ្នាទៅវិញទៅមករវាងបណ្តា​ប្រទេស​មេគង្គ-គង្គា ក្នុងការប្រយុទ្ធប្រឆាំងនឹង​ជំងឺរាត​ត្បាត​កូវីដ-១៩។

ដោយយល់ច្បាស់អំពីបញ្ហាប្រឈមដែលបង្កឡើងដោយជំងឺរាតត្បាតកូវីដ-១៩ រដ្ឋមន្រ្តីទាំងអស់បានឯកភាពលើការធ្វើសិក្ខាសា លា​ជាក់​ស្តែង ដើម្បីឆ្ពោះទៅរកការពន្លឿនដំណើរការនៃការស្តារសេដ្ឋកិច្ចសង្គម ក្រោយការរីករាលដា លជំងឺកូវីដ-១៩ ក៏ដូចជាការ​ជំរុញ​ការ​​ផ្លាស់ប្តូរគំនិត ស្តីពីវិធីលើកកម្ពស់សុខភាពសាធារណៈ និងធានាបាននូវសន្តិសុខសុខភាពក្នុងយុគសម័យក្រោយការរាត​ត្បាត​កូវីដ-១៩ ជាពិសេសការអភិវឌ្ឍការស្រាវ ជ្រាវវេជ្ជសាស្ត្រ ការផលិត ការចែកចាយថ្នាំ និងវ៉ាក់សាំង។ រដ្ឋមន្រ្តីទាំងអស់បានស្វាគមន៍ជំនួយរបស់ឥណ្ឌាដល់បណ្តាប្រទេសមេគង្គ ក្រោមគម្រោងទទួលផលរហ័ស(Quick Impact Projects) នៃកិច្ចសហប្រតិបត្តិការមេគង្គ-គង្គា និងបានកត់សម្គាល់ថា ចាប់តាំងពីការចាប់ផ្តើមរបស់ខ្លួននៅក្នុងឆ្នាំ២០១៥ គ ម្រោងចំនួន៣៨ បានបញ្ចប់ និង ៣០គម្រោងផ្សេងទៀតកំពុងអនុវត្ត។

ក្នុងឱកាសនៃកិច្ចប្រជុំនេះ ឯកឧត្តមឧបនាយករដ្ឋមន្រ្តី បានសង្កត់ធ្ងន់ថា អស់រយៈពេលពីរទសវត្សរ៍កន្លងមកនេះ គម្រោង និងសកម្​ភាព​​ជាច្រើនក្រោមក្របខណ្ឌនៃកិច្ចសហប្រតិបត្តិការមេគង្គ-គង្គា បា នចូលរួមយ៉ាងសកម្មក្នុងការអភិវឌ្ឍនៅក្នុងអនុតំបន់មេគង្គ រួម​មាន​វិស័យសុខាភិបាល អប់រំ បរិស្ថាន និងវប្បធម៌។

ព្រមជាមួយគ្នានេះដែរ កិច្ចសហប្រតិបត្តិការមេគង្គ-គង្គា បានចូល​រួម​ចំណែក​យ៉ាង​សំខាន់​ ក្នុងការលើកកម្ពស់ទំនាក់ទំនងជិតស្និទ្ធ ការយោគយល់ និងការជឿទុកចិត្តគ្នា ព្រមទាំងបានលើកកម្ព ស់ការ​អភិវឌ្ឍ​សង្គម​សេ​ដ្ឋ​​កិច្ច​នៅក្នុងអនុតំបន់មេគង្គ ដើម្បីឈាន​ទៅ​សម្រេច​ឱ្យបាននូវសុខុមាលភាព និងវិបុលភាព សម្រាប់ប្រជាជននៃ​ប្រទេស​សមា​ជិក។

ឯកឧត្តមឧបនាយករដ្ឋមន្រ្តី បានគូសបញ្ជាក់ពីភាពចាំបាច់ក្នុងការប្តេជ្ញាចិត្តច្បាស់លាស់របស់ប្រទេសឥណ្ឌា ក្នុងការផ្តល់​ហិរញ្ញប្បទាន​ដល់គម្រោងទទួលផលរហ័ស ចំពោះប្រទេសកម្ពុជា និងប្រទេសមេគង្គដទៃទៀត ដោយបាននាំមកនូវលទ្ធផលជា ក់ស្តែងជាច្រើន ដែ​ល​​រួម​ចំណែក​ដល់ការលើកកម្ពស់ជីវភាពរស់នៅរបស់ប្រជាជននៅក្នុងអនុតំបន់មេគង្គ និងបានថ្លែងអំណរគុណផងដែរ ចំពោះ​ប្រទេស​ឥណ្ឌា ដែលបានបង្កើននូវការផ្តល់ជំនួយសម្រាប់គ​ម្រោង​ទទួលផលរហ័សដល់កម្ពុជា។

ឯកឧត្តម ឧបនាយករដ្ឋមន្រ្តីបានការគាំទ្រ និងវាយតម្លៃខ្ពស់ ចំពោះសារមន្ទីរវាយនភណ្ឌប្រពៃណីអាស៊ី ដែលបានបង្កើត​ឡើងក្នុងឆ្នាំ​២​០​១​៤ នៅខេត្តសៀមរាប ដែលជាសមិទ្ធផលមួយដែលឆ្លុះបញ្ចាំងអំពីសារៈសំខាន់ និងនិរន្តរភាព នៃកិច្ចសហប្រតិបត្តិការ​មេគង្គ-​គង្គា​។

ជាអកុសល ឧស្សាហកម្មទេសចរណ៍ត្រូវបានរងផលប៉ះពាល់យ៉ាងខ្លាំងដោយជំងឺរាតត្បាតកូវីដ-១៩ ដែលជាហេតុធ្វើឱ្យ​ប៉ះពាល់​ដល់​ប្រតិបត្តិ​ការ​ប្រចាំ​ថ្ងៃរបស់សារមន្ទីរ។ ក្នុងន័យនេះ មានតែផែនការស្តារឡើងវិញរបស់សារមន្ទីរ ដែលមានការគាំទ្រ​ពីបណ្តា​ប្រទេសជា​ស​មា​ជិក​តែប៉ុណ្ណោះ ទើបអាចដោះស្រាយនូវរាល់បញ្ហាប្រឈមនានា ហើយអាចឈានទៅរកភាពប្រ​ក្រ​តី​ជាថ្មីឡើងវិញ៕ ដោយ៖ គង់ ឌិន