អ្នកប្រកបមុខរបរធ្វើគ្រឿងតុបតែលម្អ អបអរសាទរពិធីបុណ្យចូលឆ្នាំថ្មី ប្រពៃណីខ្មែរ កំពុង​ទទួល​ការ​គាំទ្រ និងមានតម្រូវការទិញច្រើន ពីប្រជាពលរដ្ឋ អ្នកបម្រើការងារ អ្នកប្រកបអាជីវកម្មនានា ដើម្បី​យកទៅតុបតែងលម្អរនៅតាមកេហដ្ឋាន វត្តអារាម សាលារៀន រមណីយដ្ឋានទេសចរណ៍ មូល​ដ្ឋានអាជីវកម្ម និងទីតាំងប្រារព្ធកម្មវិធីសង្ក្រាន្តទទួលទេវតាថ្មី។

លោក ជុំ ប៊ុនលី ម្ចាស់សិប្បកម្មកូមផ្កាយ ក្នុងសង្កាត់និរោធ ខ័ណ្ឌច្បារអំពៅ រាជធានីភ្នំពេញ ថ្លែង​ប្រាប់ BTV នៅថ្ងៃទី៤ ខែមេសានេះថា ក្នុងអំឡុងបុណ្យចូលឆ្នាំថ្មី ប្រពៃណីខ្មែរឆ្នាំនេះ សិប្បកម្ម​រប​ស់​លោកបានពង្រីកការដាក់ទុនប្រមាណ ៤០០០ ដុល្លារ ដើម្បីធ្វើគ្រឿងតុបតែងលម្អរ​ដោយ​ស្នាដៃ​កូនខ្មែរ មានដូចជា កូមផ្កាយគ្រប់ប្រភេទ កាត់អក្សរ សួស្តីឆ្នាំថ្មី  ធ្វើកូមផ្ការំដួល ទង់ខ្សែ​ចំរុះពណ៌ រូបព្រះឆាយាល័ក្ខណ៍ ជាច្រើនទំហំ។ ខណៈពីមួយឆ្នាំទៅមួយឆ្នាំ គ្រឿងតុបតែលម្អ បុណ្យ​ចូលឆ្នាំខ្មែរនេះ ទទួលការគាំទ្រ និងមានការបញ្ជាទិញកើនឡើងជាលំដាប់ ពីប្រជាពលរដ្ឋ អ្នក​បម្រើការងារតាមអង្គភាព ក្រសួងស្ថាប័នរដ្ឋ ឯកជន តាមវត្តអារាម និងមានការ​បញ្ជាទិញ​ពីបណ្តា​អាជីវករនានា ដើម្បីយកទៅចែកចាយលក់បន្ត នៅក្នុងរាជធានីភ្នំពេញ និងនៅ​តាមបណ្តា​ខេត្តនានា​ទៀត។

បណ្តាអ្នកប្រើប្រាស់បានថ្លែងថារៀងរាល់ឆ្នាំ ក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរ​ជិត​ឈាន​ចូល​ម​កដល់ ពលរដ្ឋគាំទ្រស្នាដៃកូនខ្មែរ និងតែងតែនាំគ្នាទិញកូមផ្កាយ ខ្សែទង់ចំរុះពណ៌ និង​គ្រឿង​តុបតែងនានា ដើម្បីយកទៅតុបតែលម្អ កេហដ្ឋានទទួលទេវតាឆ្នាំថ្មី និងតុបតែង​លម្អ​នៅ​តាម​កន្លែងធ្វើការងារ ដើម្បីសម្រាប់ពិធីសង្ក្រាន្ត អបអរសាទរ​ពិធី​បុណ្យចូលឆ្នាំថ្មី​ប្រពៃណីខ្មែរ​ផង​ដែរ​។

សូមបញ្ជាក់ថា បណ្តាស្ថាប័នថ្នាក់ជាតិ និងថ្នាក់ក្រោមជាតិ ក៏បានអំពាវនាវឲ្យគ្រប់បណ្តាអង្គភាព មន្ទីរ​ក្រោមឱវាទ បណ្តាមូលដ្ឋានអាជីវកម្ម សហគ្រាស សាលារៀន វត្តអារាម រមណីយដ្ឋាន​ទេសចរណ៍​ជា​ដើម ត្រូវរៀបចំតុបតែងគ្រឿងលម្អរតាមបែបវប្បធម៌ខ្មែរ លេងល្បែងកម្សាន្ត​បែប​ប្រជាប្រិយ​ខ្មែរ និងហាមលេងល្បែងបង្កគ្រោះថ្នាក់មានដូចជា ល្បែងបាញ់ទឹក ជះទឹក ប៉ាតម្សៅ លេងល្បែង​ស៊ីសង និងគ្រឿងផ្ទុះនានាជាដើម៕ អត្ថបទ ស៊ុម សុខជា