ក្រសួងការពារជាតិ សហការជាមួយមជ្ឈមណ្ឌលជាតិផ្តល់ឈាម នៅថ្ងៃទី០៤ ខែមេសា នេះ បាន រៀបចំ​ពិធីបរិច្ចាគឈាម ក្រោមប្រធានបទ «ផ្តល់ឈាម ផ្តល់ក្តីស្រលាញ់» ។ ពិធីនេះ​រៀបចំ​ធ្វើ​ឡើង​នៅ ទីស្តីការក្រសួងការពារជាតិ ដោយមានអ្នកចូលរួមបរិច្ចាគឈាម ចំនួន១ពាន់នាក់ ។

លោកជំទាវនាយឧត្តមសេនីយ៍ ដាំ ដារីនី រដ្ឋលេខាធិការ តំណាងឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រីរដ្ឋមន្ត្រី រដ្ឋមន្រ្តីក្រសួងការពារជាតិ បានមានប្រសាសន៍ថា ការ​ចូល​រួម​បរិច្ចាគឈាមនាថ្ងៃនេះ ធ្វើឡើងក្នុងគោលបំណងបង្កើតទម្លាប់ និងវប្បធម៌​នៃ​ការ​បរិច្ចាគ​ឈាម​ដោយ​ស្ម័គ្រចិត្ដ និង ជំរុញដល់យោធិនទាំង​អស់​ឱ្យចូលរួម​សកម្ម​ជាមួយ​នឹង​សេវា​កម្មជាតិ​ផ្ដល់​ឈាម​នៅ​ទូទាំងប្រទេស ដើម្បី ធានាឱ្យមានការផ្គត់ផ្គង់ឈាម សម្រាប់អ្នកជំងឺ​ដែល​ត្រូវ​ការ​ឈាម​នៅ​តាម​មន្ទីរពេទ្យទូទាំងប្រទេស ដោយ មិនរើសអើង ប្រកាន់ជាតិសាសន៍ ឬសាសនា ។

យោធិន​បានលើកឡើងដែរថា ការចូលរួមបរិច្ចាគឈាម គឺចង់ចូលរួមចំណែកដល់សង្គមជាតិ និង ជា​ពិសេសជួយអ្នកជំងឺដែលត្រូវការឈាមជាចាំបាច់ ។

វេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានបញ្ជាក់ថា ការបរិច្ចាគឈាមមិនប៉ះ ពាល់​ដល់សុខភាពទេ ថែមទាំងមានអត្ថប្រយោជន៍ផ្ទាល់ខ្លួន ដូចជា៖ ជួយកាត់​បន្ថយ​ផងដែរ​នូវ​ហានិភ័យ នៃជំងឺមហារីកនានា, កាត់បន្ថយកំហាប់ឈាម និងលើសជាតិដែក ដែលធ្វើ​ឱ្យ​មាន​ផល​ប៉ះពាល់​ដល់ថ្លើម និងលំពែង, ជួយធ្វើឱ្យប្រសើរឡើងនូវសុខភាពបេះដូង បន្ថយការឡើងទម្ងន់ និង​ជំងឺដាច់សរសៃឈាម ក្នុងខួរក្បាល ជាដើម ។

លោកវេជ្ជបណ្ឌិត បានបន្តទៀតថា នៅឆ្នាំ២០២៣ មជ្ឈមណ្ឌជាតិផ្តល់ឈាម ត្រូវការឈាមមួយ ប្លោករៀងរាល់៥នាទីម្តង ដើម្បីជួយសង្គ្រោះអាយុជីវិតអ្នកជំងឺ។ តម្រូវ​ការឈាម​ប្រចាំ​ថ្ងៃ​សរុប​មាន​ពី​៣០០ ទៅ៣៥០ប្លោក នៅរាជធានីភ្នំពេញ។ សម្រាប់តម្រូវការនៅទូទាំងប្រទេស មានប្រមាណ​១៤​ម៉ឺន​ប្លោក ហើយមជ្ឈមណ្ឌលជាតិផ្តល់ឈាម បានធានាការផ្គត់ផ្គង់៧៥ភាគរយ នៃតម្រូវការ​នេះ​។

របាយការណ៍​របស់អង្គសុខភាពពិភពលោក បានឱ្យដឹងថា ការទទួលអំណោយឈាមពីសប្បុរស ជន​ដោយស្ម័គ្រចិត្តមិនទទួលកម្រៃ ឆ្លើយតបបានតែ១៩.៥ភាគរយនៃតម្រូវការក្នុងប្រទេសកម្ពុជា ខណៈ ប្រទេសជិតខាង ការបរិច្ចាគឈាមដោយស្ម័គ្រចិត្ត អាចផ្គត់ផ្គង់​រហូត​លើសពី​៩០ភាគរយ នៃ​តម្រូវការ៕ អត្ថបទ៖ ទូច សោភ័ណ