ភ្នំពេញ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅថ្ងៃទី០៤ ខែមេសា ឆ្នាំ២០២៤ បានអញ្ជើញជាអធិបតីបើកកិច្ចប្រជុំ​បូកសរុបលទ្ធផលការងារ​អន្តរាគមន៍​សង្គ្រោះ​ស្រូវប្រាំង​ជូនប្រជាកសិករឆ្នាំ២០២៤។ កិច្ចប្រជុំនេះ រៀបចំធ្វើឡើងនៅ ទីស្តីការក្រសួង។

នៅក្នុងកិច្ចប្រជុំ ឯកឧត្តមរដ្ឋមន្ត្រីបានណែនាំដល់ថ្នាក់ដឹកនាំ ប្រធានមន្ទីរធនធានទឹក និង​ឧតុនិយម​រាជធានី-ខេត្ត និងមន្ត្រីបច្ចេកទេស សូមបន្តតាម​ដានដោយ​យកចិត្តទុកដាក់​លើ​ស្ថានភាព​ទឹក​នៅតាមអាងទឹកនិងប្រព័ន្ធធារាសាស្ត្រនានា ប្រកបដោយការទទួលខុសត្រូវខ្ពស់ ថែ​រក្សា​ទឹកទុកឱ្យបានល្អ និងប្រើប្រាស់ឱ្យចំទិសដៅ។

ឯកឧត្តមបន្តថាទៀតថា ក្នុងបរិបទនៃការប្រែប្រួលអាកាសធាតុ និងការឡើង​កម្តៅ​នៃ​ភពផែនដី​បាន​ធ្វើ​ឱ្យស្ថានភាពធាតុអាកាសកាន់តែមានលក្ខណៈធ្ងន់ធ្ងរ និងបង្កឱ្យមានគ្រោះទឹកជំនន់ និង​គ្រោះរាំងស្ងួតកាន់តែកើនឡើង ដែលបង្កការខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធ និង​ទ្រព្យ​សម្បត្តិ រំខានដល់សកម្មភាពសេដ្ឋកិច្ច និងអាយុជីវិតរបស់ប្រជាជន។ ចាប់តាំងពីខែធ្នូ ឆ្នាំ២០២៣ រហូត​ដល់ថ្ងៃទី៣១ ខែមីនា ឆ្នាំ២០២៤នេះ ក្រុមការងារក្រសួងធនធានទឹក និងឧតុនិយម និង​មន្ទីរ​រាជធានី-ខេត្ត រួមជាមួយអាជ្ញាធរមូលដ្ឋានគ្រប់លំដាប់ថ្នាក់ បានធ្វើ​អន្តរាគមន៍យ៉ា​ង​សស្រាក់​សស្រាំ​បូម​ទឹកយកទៅសង្គ្រោះស្រូវប្រាំងជូនប្រជាកសិករដែលជួបប្រទះបញ្ហាខ្វះទឹក ដោយ​ទទួល​បាន​ជោគជ័យលើផ្ទៃដីអន្តរាគមន៍សរុបប្រមាណ ៦០ ១១៩ ហិកតា នៅតាមបណ្តា​ខេត្ត​ចំនួន១៤។

ទន្ទឹមនឹងនេះ ឯកឧត្តមរដ្ឋមន្ត្រីបានបង្ហាញនូវការជឿជាក់ថា តាមរយៈកិច្ច​ប្រជុំ​បូក​សរុប​លទ្ធផល​ការងារ​អន្តរាគមន៍ដែលបាននិងកំពុងអនុវត្តក្រោមកិច្ចសហការពីគ្រប់ភាគីពាក់ព័ន្ធនាពេលនេះ នឹង​រ​កឃើញនូវចំណុចខ្លាំង និងចំណុចខ្សោយ ក៏ដូចជា​បទ​ពិសោធន៍​ក្នុង​ការ​អនុវត្ត​ការងារ​កន្លង​មក ធ្វើជាមូលដ្ឋានដើម្បីឱ្យការអនុវត្តការងារនៅពេលខាងមុខកាន់តែមានប្រសិទ្ធភាពថែមទៀត និង​សម្រេចបានជោគជ័យ ក្រោមកិច្ចសហការកាន់តែល្អ មានការទទួលខុសត្រូវខ្ពស់ និងការ​ចូលរួម​កាន់​តែសកម្ម។

សូមបញ្ជាក់ថា ក្នុងឆ្នាំ២០២៤នេះ ក្រសួងបានអន្តរាគមន៍​បូមទឹក​សង្គ្រោះ​ស្រូវប្រាំង​ជូន​ប្រជាកសិករ​ដែល​ប្រឈមខ្វះទឹកស្រោចស្រពនៅតាមបណ្តាខេត្តចំនួន១៤ រួមមាន៖ ខេត្ត​បន្ទាយមានជ័យ ខេត្តតាកែវ ខេត្តកំពត ខេត្តត្បូងឃ្មុំ ខេត្តកំពង់ឆ្នាំង ខេត្តកំពង់ធំ ខេត្តក្រចេះ ខេត្តកំពង់ចាម ខេត្តកណ្តាល ខេត្តស្វាយរៀង ខេត្តកំពង់ស្ពឺ ខេត្តពោធិ៍សាត់ ខេត្តព្រៃវែង និងខេត្តប៉ៃលិន៕ អត្ថបទ៖ទូច សោភ័ណ