ប្រធានអង្គការសុខភាពពិភពលោក (WHO) បាននិយាយកាលពីថ្ងៃពុធ (០៣ មេសា) ថាមានមន្ទីរពេទ្យត្រឹមតែ ១០ កន្លែងប៉ុណ្ណោះដែលនៅតែដំណើរការនៅក្នុងតំបន់ហ្កាហ្សាស្ទ្រីប ស្របពេលមានភាពតានតឹងកាន់តែខ្លាំងឡើងនៅក្នុងសង្គ្រាមអ៊ីស្រាអែល-ហាម៉ាស។

មានតែមន្ទីរពេទ្យចំនួន ១០ ប៉ុណ្ណោះក្នុងចំណោមមន្ទីរពេទ្យទាំង ៣៦ ទីតាំងរបស់ហ្កាហ្សាដែលនៅតែអាចដំណើរការបាន ខណៈមន្ទីរពេទ្យមួយចំនួនត្រូវដំណើរការដោយផ្នែកព្រោះតែត្រូវរងការបំផ្លិចបំផ្លាញ។ អង្គការសុខភាពពិភពលោក នឹងបន្តគាំទ្រដល់មន្ទីរពេទ្យទាំងនោះដើម្បីផ្តល់សេវាឱ្យបានល្អបំផុតតាមដែលអាចធ្វើបាន។

អគ្គនាយកអង្គការសុខភាពពិភពលោក លោក តេដ្រូស អាដហាណូម ហ្គេប្រេយ៉េស៊ូស (Tedros Adhanom Ghebreyesus) បាននិយាយថា មនុស្សជាង ៣៣.០០០ នាក់ឥឡូវនេះត្រូវបានសម្លាប់នៅហ្កា ហើយជិត ៨០.០០០ នាក់ផ្សេងទៀតបានរងរបួស។

WHO បាននិយាយថា នាពេលបច្ចុប្បន្ននេះ សេវាវេជ្ជសាស្រ្ដនៅតំបន់ហ្កាហ្សាស្ទ្រីប ត្រូវបានបំផ្លាញ ហើយមនុស្សរាប់ពាន់នាក់ត្រូវផ្ទេរទៅកាន់ស្ថាប័នវេជ្ជសាស្ត្រក្នុងតំបន់ផ្សេងទៀតដើម្បីព្យាបាល។

ការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុមហាម៉ាស កាលពីថ្ងៃសៅរ៍ បាននិយាយនៅក្នុងសេចក្តីថ្លែងការណ៍មួយថា កងទ័ពអ៊ីស្រាអែល បានសម្លាប់ជនជាតិប៉ាឡេស្ទីនយ៉ាងហោចណាស់ ៤០០ នាក់ និងបានចាប់ខ្លួនជាង ៩០០ នាក់ផ្សេងទៀតក្នុងអំឡុងពេលប្រតិបត្តិការយោធារបស់ខ្លួននៅឯមន្ទីរពេទ្យ អាល់ស៊ីហ្វា (Al-Shifa) ដែលជាមន្ទីរពេទ្យដ៏ធំបំផុតនៅក្នុងតំបន់ហ្កាហ្សា៕