មន្ត្រីអាមេរិកម្នាក់បាននិយាយថា ប្រធានាធិបតីអាមេរិក លោក ចូ បៃដិន (Joe Biden) នឹងនិយាយតាមទូរសព្ទជាមួយនាយករដ្ឋមន្ត្រីអ៊ីស្រាអែល លោក បេនចាមីន ណាតាន់យ៉ាហ៊ូ (Benjamin Netanyahu) នៅថ្ងៃព្រហស្បតិ៍ (០៤ មេសា) នេះ រយៈពេលបីថ្ងៃបន្ទាប់ពីអ៊ីស្រាអែល បានបើកការវាយប្រហារដែលក្នុងនោះបុគ្គលិកជំនួយរបស់ទីភ្នាក់ងារផ្ទះបាយកណ្តាលរបស់ពិភពលោក (WCK) ចំនួន ៧ នាក់ត្រូវបានសម្លាប់។

សេតវិមាននិយាយថា លោក បៃដិន ថាមានការខឹងសម្បារ និងខូចចិត្តយាងខ្លាំងចំពោះការវាយប្រហារនេះ ប៉ុន្តែលោកប្រធានាធិបតីរូបនេះមិនបានធ្វើការផ្លាស់ប្តូរជាមូលដ្ឋាននៅក្នុងការគាំទ្រយ៉ាងខ្ជាប់ខ្ជួនរបស់សហរដ្ឋអាមេរិក ចំពោះអ៊ីស្រាអែល ក្នុងជម្លោះរបស់ខ្លួននៅហ្កាហ្សានោះទេ។ មន្ត្រីអាមេរិកម្នាក់បាននិយាយថា លោក បៃដិន ទំនងជានឹងនាំយកនូវតម្រូវការសម្រាប់ការការពារកាន់តែប្រសើរឡើងសម្រាប់បុគ្គលិកមនុស្សធម៌ និងកំណើននៃការដឹកជញ្ជូនអាហារទៅកាន់តំបន់ហ្កាហ្សា។

មេចុងភៅដ៏ល្បីឈ្មោះ លោក ហូសេ អាន់ដ្រេស (Jose Andres) ដែលបានបង្កើតទីភ្នាក់ងារ WCK បាននិយាយថា យោធាអ៊ីស្រាអែល បានកំណត់គោលដៅលើបុគ្គលិកជំនួយរបស់ខ្លួន «ដោយចេតនា» ហើយលោកបានច្រានចោលការអះអាងរបស់អ៊ីស្រាអែល និងសហរដ្ឋអាមេរិក ដែលថានោះគ្រាន់តែជាកំហុសឆ្គងមួយ។

លោក អាន់ដ្រេស បានអំពាវនាវឱ្យមានការស៊ើបអង្កេតលើឧប្បត្តិហេតុនេះដោយរដ្ឋាភិបាលសហរដ្ឋអាមេរិក និងដោយប្រទេសកំណើតរបស់បុគ្គលិកជំនួយទាំងអស់ដែលត្រូវបានសម្លាប់។ យោងតាម WCK បានឱ្យដឹងថា បុគ្គលិកទាំងប្រាំពីរនាក់នោះមកពីប៉ាឡេស្ទីន អូស្ត្រាលី ប៉ូឡូញ ចក្រភពអង់គ្លេស និងជាពលរដ្ឋសញ្ជាតិពីររបស់កាណាដា-សហរដ្ឋអាមេរិក៕