របាយការណ៍ស៊ើបការណ៍សម្ងាត់បំផុតមួយដែលត្រូវបានព្រាងមួយសប្តាហ៍ នៅមុនការបោះឆ្នោតសកលឆ្នាំ២០២១ របស់ប្រទេសកាណាដា បានព្រមានអំពីការប៉ុនប៉ងដែលកំពុងបន្តមានឥទឈប់ឈររបស់រដ្ឋាភិបាលចិន ដើម្បីជ្រៀតជ្រែកក្នុងការប្រកួតប្រជែងមួយចំនួន ដោយនិយាយថា ទីក្រុងប៉េកាំងបាន «កំណត់អត្តសញ្ញាណអ្នកនយោបាយកាណាដាដែលចាត់ទុកថា ជាគូប្រជែងរបស់ប្រទេសចិន»។

អ្នកនយោបាយទាំងនោះបានក្លាយជាគោលដៅនៃយុទ្ធនាការបណ្ដាញសង្គមស្រមោល ដោយមានការសង្ស័យថា មានទំនាក់ទំនងទៅនឹងរដ្ឋាភិបាលចិន ដែលបានផ្សព្វផ្សាយ «ប្រវត្តិរឿងរ៉ាវក្លែងក្លាយ» អំពីពួកគេ និងបានជំរុញឲ្យប្រជាជនកាណាដាបោះឆ្នោតប្រឆាំងនឹងពួកគេ។

ការស៊ើបការណ៍សម្ងាត់អំពីការជ្រៀតជ្រែកដែលទំនងជាអាចកើតមាន នៅក្នុងការបោះឆ្នោតសកលចុងក្រោយរបស់កាណាដា ត្រូវបានរួមបញ្ចូលនៅក្នុងឯកសារដែលត្រូវបានបញ្ចេញ កាលពីថ្ងៃពុធ (ទី៣ ខែមេសា) នៅឯសវនាការសាធារណៈមួយ ចំពោះមុខគណៈកម្មការស៊ើបអង្កេតការជ្រៀតជ្រែកពីបរទេស។

ការចេញផ្សាយឯកសារសម្ងាត់នេះ បានកើតឡើងបន្ទាប់ពីមានរបាយការណ៍ព័ត៌មានរបស់កាណាដា កាលពីឆ្នាំមុនដែលរៀបរាប់អំពីសកម្មភាពរបស់រដ្ឋាភិបាលចិន និងបានលើកឡើងពីការព្រួយបារម្ភអំពីភាពងាយរងគ្រោះនៃស្ថាប័នប្រជាធិបតេយ្យរបស់ប្រទេសកាណាដា។

បណ្ដាអ្នកនយោបាយកាណាដាដែលគេជឿថា ត្រូវបានកំណត់គោលដៅដោយទីក្រុងប៉េកាំង ក៏បានផ្តល់សក្ខីកម្មនៅឯសវនាការ កាលពីថ្ងៃទី៣ ខែមេសានោះដែរ ដោយនិយាយថា ពួកគេបានធ្វើឲ្យរដ្ឋាភិបាលចិនខឹងសម្បា ពាក់ព័ន្ធនឹងការរិះគន់កំណត់ត្រារបស់ប្រទេសនេះ ជុំវិញបញ្ហាសិទ្ធិមនុស្ស ក្នុងចំណោមបញ្ហាផ្សេងៗទៀត។

គួរបញ្ជាក់ថា សវនាការសាធារណៈនៅទីក្រុង Ottawa គឺជាផ្នែកមួយនៃការស៊ើបអង្កេតរបស់សហព័ន្ធលើការជ្រៀតជ្រែកក្នុងប្រព័ន្ធនយោបាយរបស់ប្រទេសកាណាដាពីប្រទេសចិន និងប្រទេសដទៃទៀត ជាពិសេសក្នុងអំឡុងពេលការបោះឆ្នោតសកល ២ដងកន្លងមក។ នាយករដ្ឋមន្ត្រី លោក Justin Trudeau បានយល់ព្រមអំពាវនាវឲ្យមានការស៊ើបអង្កេត នៅក្នុងខែកញ្ញា បន្ទាប់ពីប្រឈមនឹងការរិះគន់ខ្លាំងឡើងៗ តាមប្រព័ន្ធផ្សព្វផ្សាយព័ត៌មាន និងពីសំណាក់អ្នកនយោបាយប្រឆាំង ពាក់ព័ន្ធនឹងករណីជ្រៀតជ្រែកនេះ៕