បន្ទាប់ពីបងប្រុសរបស់លោកត្រូវបានសម្លាប់នៅក្នុងកុបកម្មប្រឆាំងពួកមូស្លីម លោក Pervez Qureshi បានមើលវីដេអូជាច្រើនដែលគាត់ជឿថា បានញុះញង់ពួកឃាតករ ពោលគឺជាផ្នែកមួយនៃរលកនៃការស្អប់ខ្ពើមដែលត្រូវបានបង្ហោះលើបណ្ដាញសង្គម នៅមុនការបោះឆ្នោតរបស់ប្រទេសឥណ្ឌា។

ប្រទេសឥណ្ឌាមានប្រវត្តិការប៉ះទង្គិចគ្នាជាយូរមកហើយ និងគួរឲ្យខ្លាច រវាងអ្នកកាន់សាសនាហិណ្ឌូភាគច្រើន និងអ្នកមានជំនឿភាគតិចបំផុតរបស់ប្រទេស ប៉ុន្តែអ្នកវិភាគព្រមានថា ការមានបច្ចេកវិទ្យាទំនើបកាន់តែច្រើនឡើង កំពុងត្រូវបានប្រើប្រាស់ដើម្បីកេងចំណេញពីជម្លោះនេះដោយចេតនា។

ដោយរំលឹកពីការវាយប្រហារលើបងប្រុសរបស់ខ្លួនឈ្មោះ Faheem កាលពីខែកុម្ភៈ នៅទីក្រុង Haldwani ភាគខាងជើង ក្នុងរដ្ឋ Uttarakhand លោក Qureshi បានប្រាប់សារព័ត៌មាន AFP ថា៖ «វីដេអូ និងសារ ត្រូវបានចែករំលែកនៅលើបណ្ដាញសង្គម Facebook និង WhatsApp ដែលមានភាសាអុជអាល និងការញុះញង់ រហូតនាំឲ្យមានអំពើហិង្សាកើតឡើង។ ទង្វើនោះបានបំពុលបរិយាកាសសង្គមយ៉ាងធ្ងន់ធ្ងរ»។

គួរបញ្ជាក់ថា បើយោងតាមតួលេខពីសមាគមប្រព័ន្ធអ៊ីនធឺណិត និងទូរសព្ទរបស់ប្រទេសឥណ្ឌា បានឲ្យដឹងថា ប្រជាជនឥណ្ឌាជិត ៥៥០លាននាក់ មានលទ្ធភាពប្រើប្រាស់ប្រព័ន្ធអ៊ីនធឺណិតច្រើនជាងពេលដែលនាយករដ្ឋមន្ត្រីលោក Narendra Modi ឡើងកាន់អំណាច កាលពី ១ទសវត្សរ៍មុន។

គណបក្ស Bharatiya Janata Party (BJP) របស់លោក Modi ត្រូវបានគេរំពឹងយ៉ាងទូលំទូលាយថា នឹងឈ្នះអាណត្តិទី៣ នៅក្នុងការបោះឆ្នោតដែលនឹងចាប់ផ្តើមនៅថ្ងៃទី១៩ ខែមេសា។ ហើយផ្នែកមួយនៃប្រជាប្រិយភាពរបស់លោក អាចមានការរួមចំណែកពីក្រុមយុទ្ធនាការអនឡាញដ៏ប៉ិនប្រសប់របស់គណបក្សលោក ពោលគឺជាក្រុមត្រូវបានគ្រប់គ្រងដោយអ្នកស្ម័គ្រចិត្ដរាប់ពាន់នាក់ដែលធ្វើយុទ្ធនាការគាំទ្រដល់ការប្រព្រឹត្តល្អ និងសមិទ្ធផលរបស់លោក៕