នាយករដ្ឋមន្ត្រីអូស្ត្រាលីលោក Anthony Albanese នៅថ្ងៃព្រហស្បតិ៍ (ទី៤ ខែមេសា) នេះ បាននិយាយថា ការពន្យល់របស់អ៊ីស្រាអែល ជុំវិញការស្លាប់ដោយសារការវាយប្រហារតាមអាកាសនៅតំបន់ហ្កាហ្សារបស់បុគ្គលិកជំនួយចំនួន ៧នាក់ ក្នុងនោះរួមទាំងស្ត្រីជនជាតិអូស្ត្រាលីឈ្មោះ Zomi Frankcom ផងដែរនោះ គឺ «មិនទាន់ល្អគ្រប់គ្រាន់នៅឡើយទេ»។

អ៊ីស្រាអែល កាលពីថ្ងៃអង្គារ (ទី២ ខែមេសា) បានប្រាប់ថា ខ្លួនបានសម្លាប់បុគ្គលិករបស់អង្គការសប្បុរសធម៌ World Central Kitchen ដោយច្រឡំ ដែលការសម្លាប់នេះបាននាំឲ្យមានការថ្កោលទោសយ៉ាងទូលំទូលាយពីសហរដ្ឋអាមេរិក និងសម្ព័ន្ធមិត្តជាច្រើន។ អ្នកស្លាប់រួមមានពលរដ្ឋអូស្ត្រាលី អង់គ្លេស និងប៉ូឡូញ ព្រមទាំងប្រជាជនប៉ាឡេស្ទីន និងពលរដ្ឋសញ្ជាតិ២ អាមេរិក និងកាណាដាផងដែរ។

អំឡុងសន្និសីទកាសែតនៅទីក្រុងស៊ីដនី លោក Albanese បាននិយាយថា៖ «យើងត្រូវមានការទទួលខុសត្រូវ ចំពោះអ្វីដែលបានកើតឡើង ហើយអ្វីដែលមិនល្អគ្រប់គ្រាន់នោះ គឺសេចក្តីថ្លែងការណ៍ដែលត្រូវបានធ្វើឡើង រួមទាំងថា នេះគ្រាន់តែជាលទ្ធផលនៃសង្រ្គាម»។

ការលើកឡើងរបស់លោក Albanese នេះ ហាក់ដូចជាកំពុងសំដៅទៅលើការអត្ថាធិប្បាយរបស់នាយករដ្ឋមន្ត្រីអ៊ីស្រាអែល លោក Benjamin Netanyahu នៅក្នុងសារវីដេអូមួយ កាលពីថ្ងៃអង្គារ ដែលលោកបាននិយាយថា «ហេតុការណ៍នេះកើតឡើងអំឡុងពេលមានសង្រ្គាម» ខណៈដែលយោធាអ៊ីស្រាអែលបានសន្យាថា នឹងមានការស៊ើបអង្កេតឯករាជ្យ៕